Sottalǵan er adam Býrabaıǵa qashyp, jańa ómir bastamaq bolǵan

PETROPAVL. QazAqparat – Soltústik Qazaqstan oblysynda bir jylǵa bostandyǵy shektelgen turǵyn probatsııa qyzmetinen qashyp, Býrabaı kýrorttyq aımaǵynda tyǵylyp jatqan, dep habarlaıdy QazAqparat tilshisi.

SQO boıynsha Qylmystyq-atqarý júıesi departamenti baspasóz qyzmetiniń málimetinshe, Petropavl qalalyq soty Z.-ny QR Qylmystyq kodeksiniń 188-baby 1-bóligi boıynsha, ıaǵnı urlyq jasaǵan úshin sottap, bir jylǵa bas bostandyǵyn shektedi. Osy merzimge probatsııalyq baqylaý belgilenip, jergilikti atqarýshy bılik bekitken orynda 100 saǵat qoǵamdyq jumys atqarýǵa mindetteldi.

«Sottalǵan probatsııa qyzmetine esepke qoıylǵan kezde jazasyn óteýge qatysty barlyq talappen tanysty, ony oryndamaǵan jaǵdaıda qandaı shara qoldanylatyny týraly eskertildi.

Biraq, soǵan qaramastan ol baqylaýdan qashyp, belgilengen jazadan qutylmaq boldy», - deıdi SQO boıynsha QAJD Qyzyljar aýdandyq probatsııalyq qyzmet bóliminiń ınspektory Vera Nıkıtenko.

Probatsııa qyzmetiniń qyzmetkerleri bastapqy izdestirý is-sharalaryn júrgizgenimen, sottalǵan adamnyń júrgen jerin anyqtaý múmkin bolmady. Osydan keıin probatsııa qyzmetiniń er adamǵa izdeý jarııalaý týraly usynysy qanaǵattandyryldy.

Jedel-izdestirý is-sharalary barysynda sottalǵan Petropavl qalasynda ustalyp, ýaqytsha ustaý ızolıatoryna qamaýǵa alyndy.

«Sottalǵan adam óz kinásin tolyq moıyndady. Probatsııa qyzmetiniń baqylaýynan qashyp, Aqmola oblysynyń Býrabaı aýylyna baryp qonystanǵan. Osylaısha, jasaǵan qylmysyn jáne onyń saldaryn umytyp, jańa ómir bastamaq bolǵan.

Jazany óteý kezinde ol tıisti talaptardy oryndamaǵany úshin jazanyń bas bostandyǵynan aıyrýǵa aýystyrylýy múmkindigi týraly eki ret jazbasha eskertý aldy. Sottalǵannyń isin Qyzyljar aýdandyq soty qaraıdy», - deıdi Vera Nıkıtenko.