Sotqa deıingi tergeý kezinde múlikke tyıym salý tártibi ózgermek

ASTANA. QazAqparat – Tergep-tekserý kezinde prokýror múlikke tyıym salýdy sanktsııalasa, onda múlik ıesi qandaı zatqa birinshi kezekte tyıym salý qajettigin usynýǵa quqyly. Bul ashyq talqyǵa shyǵarylǵan «QR keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» QR Zań jobasynda kórsetilgen, dep habarlaıdy QazAqparat tilshisi.

Jańa redaktsııaǵa sáıkes, sotqa deıingi tergep-tekserý kezinde múlikke tyıym salý tártibi bekitilgen.

«Sot oryndaýshysy sotqa deıingi tergep-tekserý sheńberinde prokýror múlikke tyıym salý týraly sanktsııalanǵan qaýlysyn oryndaý úshin múliktiń bar-joǵyn tekseredi, onyń tizimdemesin jasaıdy. Bıliginde osy múlik jatqan tulǵalarǵa múlikti talan-tarajǵa salýǵa nemese onymen ózge de áreketter jasaýǵa jol berilmeıtini týraly jazbasha túrde eskertedi ne tyıym salynýy múmkin múliktiń joq ekeni týraly akt jasaıdy. Múlikke tyıym salǵan kezde múliktiń qunyn aıqyndaıtyn maman qatysýy múmkin», - delingen qujatta.

Degenmen bul oraıda múlik ıesi qandaı zattarǵa birinshi kezekte tyıym salý qajettigin usynýǵa quqyly.

«Tyıym salynǵan múlik alyp qoıylýy ne tergeý sýdıasynyń qalaýy boıynsha jergilikti ákimshiliktiń, turǵynjaı-paıdalaný uıymynyń ókiline, osy múliktiń ıelenýshisine nemese ózge de tulǵaǵa saqtaýǵa berilýi múmkin. Olarǵa múliktiń saqtalýyna jaýapty ekendigi eskertilýge tıis, bul týraly qolhat alynady. Ekinshi deńgeıdegi bankterdegi, Qazaqstan Respýblıkasy beırezıdent-bankteriniń fılıaldaryndaǵy jáne kredıttik mekemelerdegi shottar men salymdardaǵy aqshaǵa jáne ózge de qundylyqtarǵa tyıym salý kezinde osy shot boıynsha shyǵys operatsııalary tyıym salynǵan qarajat sheginde toqtatylady», - dep kórsetilgen jańa redaktsııada.

Aıta keteıik, qoldanystaǵy «Atqarýshylyq is júrgizý jáne sot oryndaýshylarynyń mártebesi týraly» QR Zańynda mundaı normalar joq.

Qujatty ashyq talqylaý 23 qańtarǵa deıin jalǵasady.