Sot júıesiniń ınstıtýtsıonaldyq derbestigi nyǵaıdy - Prezıdent
«Biz sottardyń táýelsiz bolýyna basa mán berip otyrmyz. Osyǵan oraı birqatar jumys atqaryldy. Elimizde Konstıtýtsııalyq sot quryldy. Sot júıesiniń ınstıtýtsıonaldyq derbestigi nyǵaıdy. Sala bıýdjetin basqarý quzyreti Sot ákimshiligine berildi. Kúshtik qurylymdar sýdıalarǵa qysym kórsetpeýi úshin tıisti sharalar qabyldandy. Kadrlardy irikteý júıesi jańartyldy. Birinshi satydaǵy sot tóraǵasy qazylar qaýymynyń usynysymen taǵaıyndalady. Joǵarǵy sottyń sýdıalary Konstıtýtsııada kórsetilgen jańa tártip boıynsha saılanatyn boldy, ıaǵnı, olardy Senat balamaly negizde tańdaıdy», - dedi Qasym-Jomart Toqaev.
Sonymen qatar Prezıdent alqabıler tájirıbesi keńinen qoldanyla bastaǵanyn aıtty. Qazir olardy irikteý jumysy tsıfrlyq júıege tolyq kóshken.
«Sondaı-aq Ákimshilik ádilet qyzmeti paıda boldy. Bul qurylym jeke adamdardyń jáne kásipkerlerdiń quqyǵyn tıimdi qorǵaýǵa múmkindik beredi. Búginde sot isteriniń jartysynan astamy azamattar men bıznestiń paıdasyna sheshilip jatyr. Bul – jaqsy úrdis. Túptep kelgende, munyń bári ekonomıkany órkendetýge jáne elimizdegi ınvestıtsııalyq ahýaldy jaqsartýǵa jol ashady. Investorlardyń zańǵa sáıkes ári alańsyz jumys isteýi úshin barlyq jaǵdaı jasalýy qajet. Olar memleket qorǵaýynda ekenine senimdi bolýy kerek», - dedi Memleket basshysy.
Budan buryn habarlanǵandaı, búgin elordada QR Prezıdenti Qasym-Jomart Toqaevtyń qatysýymen Qazaqstan Respýblıkasy sýdıalarynyń IX sezi bastaldy.