Sot júıesi qyzmetkerleri memlekettik attestatsııalaýda joǵary nátıje kórsetti

ASTANA. QazAqparat - Ortalyq kommýnıkatsııalar qyzmetinde ótken baspasóz qyzmetinde Joǵarǵy Sot janyndaǵy Sottardyń qyzmetin qamtamasyz etý departamentiniń basshysy Nurserik Sháripov sot júıesi qyzmetkerlerin attestatsııalaýdyń nátıjesin baıandady.

Onyń aıtýynsha, nátıjeler aıtarlyqtaı joǵary bolǵan.

«100 naqty qadam» Ult josparyn júzege asyrý aıasynda «B» korpýsyndaǵy memlekettik qyzmetshiler keshendi attestatsııadan ótti. Attestatsııa qorytyndysy boıynsha sot júıesiniń qyzmetkerleri aıtarlyqtaı joǵary nátıje kórsetti. Laýazymy men biliktiligin kórsete almaǵan tulǵalar da bar. Atap aıtqanda, 3 mamandy jumystan shyǵarý usynyldy, olar jalpy kólemniń 0,7%-yn quraıdy», - dedi ol.

Sondaı-aq, Sháripov sot júıesi qyzmetkerleriniń ózge de memlekettik qyzmetshiler sekildi eńbekaqy tóleýdiń jetildirilgen júıesine aýysatynyn atap ótti.

 «Aldaǵy ýaqytta toqsan saıyn árbir memlekettik qyzmetshi jumysynyń nátıjeliligi tekseriledi. Bonýstyq mehanızm jáne yntalandyrý jolymen belgili bir eńbekaqy tóleý júıesine aýysýdy josparlap otyrmyz», - dedi ol.

Odan bólek, QR Joǵarǵy Sotynyń ókili ınfraqurylymdyq jumystar jóninde de aıtyp berdi.

«Sottardyń jańa ǵımaratyn turǵyzý men aǵymdaǵy jóndeý jumystaryna erekshe kóńil bólýdemiz. Bıyl respýblıkalyq bıýdjet esebinen 4 óńirde jańa tıptik sot ǵımarattarynyń qurylysy bastalyp ketti. Atap aıtsaq, Qaraǵandyda oblystyq sottyń, Almaty, Aqmola jáne Jambyl oblystarynda aýdandyq sottardyń ǵımarattary salynady. Odan bólek, jergilikti atqarý organdarymen birlesip, Qostanaı, Mańǵystaý, Aqtóbe, Almaty jáne Qyzylorda oblystaryndaǵy birneshe sot mekemelerine tıptik ǵımarattar turǵyzylady», - dedi Sháripov.

Sonymen birge Sháripov taǵy 8 ǵımarattyń qurylysyna jobalar ázirlenip jatqanyn atap ótti.

«Kelesi jyly Aqtóbe oblysy men Almatynyń ǵımarattaryn turǵyzýǵa kúsh salamyz», - dep  sózin túıindedi Sháripov.