Sot sheshimimen Qazınvestbank taratyldy

ASTANA. QazAqparat - «Qazınvestbank» AQ májbúrli taratý týraly sot sheshimi óz kúshine endi, dep habarlaıdy QazAqparat Qazaqstannyń depozıtterge kepildik berý qorynyń baspasóz qyzmetine silteme jasap.

«24 qańtar kúni Almaty qalasy arnaıy mamandandyrylǵan aýdanaralyq ekonomıkalyq sotynyń «Qazınvestbank» AQ qyzmetin májbúrli túrde toqtatý (taratý) týraly zańdy kúshine endi», - delingen habarlamada.

Eske sala ketsek, «Qazınvestbank» AQ jeke tulǵalarynyń depozıtteri 100% «Alfa-Bank» EB AQ-ǵa berildi.

«Qazınvestbank» AQ qyzmetin toqtap, aktıvteri men mindettemeleri «Alfa-Bank» EB AQ-ǵa berilgen kúnnen soń, jeke tulǵalardyń shottaryna  túsken qarajat boıynsha «Qazaqstannyń depozıtterge kepildik berý qory» AQ-ǵa (QDKBQ) mindetteme júkteledi. Atalǵan mindettemelerdiń jalpy somasy shamamen 2 mıllıon teńgeni quraıdy, ótemaqy alýǵa quqyǵy bar salymshylar sany - 70. Tólem QDKBQ-nyń arnaıy rezervi qarajatymen júzege asyrylady. Kepildik berilgen ótemdi tóleýge arnalǵan QDKBQ qarajatynyń jalpy somasy - 568,6 mıllıard teńge.

QDKBQ bank-agenttiń ataýyn, tólem egjeı-tegjeıligi men merzimin agent bankpen nemese «Qazposhta» AQ kelisimge kelýi boıynsha jarııalaıdy. Eske sala ketsek, ulttyq valıýtadaǵy depozıtter boıynsha kepildiktiń eń joǵary somasy - 10 mıllıon teńgeni, shetel valıýtasyndaǵy depozıtter boıynsha - 5 mıllıon teńgeni quraıdy.