Sot sheshimimen BQO juqpaly aýrýlar aýrýhanasynyń dırektory qyzmetine qaıta oraldy
Oral qalasy №2 sotynan túsken málimetke qaraǵanda, N.Ahmetovanyń BQO densaýlyq saqtaý basqarmasy mekemesine bıylǵy 29 maýsymdaǵy buıryǵyn zańsyz dep taný jáne onyń kúshin joıý, burynǵy qyzmetin qaıta qalpyna keltirý týraly talap-aryzy qanaǵattandyryldy.
Sot talqysynda belgili bolǵanyndaı, N.Ahmetova qyzmetinen óz erkimen bosatý týraly 16 mamyrda aryz bergen. Alaıda qyzmetinen bosatý týraly buıryq shyqqanǵa deıin aryzyn qaıtyp alǵan. Sóıtip ol aryzdy qaıtyp alý jónindegi óz quqyǵyn paıdalanǵan. Sol sebepti oblystyq densaýlyq saqtaý basqarmasynda ony bosatýǵa negiz bolmaǵan.
Oǵan qosa «Memlekettik múlik týraly» QR Zańynyń 148-babynyń talaptaryna sáıkes oblystyq juqpaly aýrýlar aýrýhanasynda baqylaýshy keńes qurylǵan. Tıisti salanyń ókiletti organy basshymen kelisimshartty úzý týraly baqylaýshy keńespen kelisýi kerek. Áıtse de mundaı kelisim bolmaǵan.
Osylardy eskere kelip, sot talap-aryzdy qanaǵattandyrý týraly sheshim qabyldady.
Sheshim zańdy kúshine engen joq.
Nadııa Ahmetova QazAqparat tilshisine qyzmetine aldaǵy dúısenbiden bastap kirisetinin jetkizdi.
Eske sala keteıik, budan buryn BQO juqpaly aýrýlar aýrýhanasynyń dırektory qyzmetinen ketkenin jazǵan bolatynbyz.