Sot sheshimderin oryndaý nege uzaqqa sozylyp ketedi
Jeke sot oryndaýshylary palatasynyń tóraǵasy Ernar Ibraevtyń aıtýynsha, aryz berýshiniń shaǵymy boıynsha sottyń oń sheshimi shyqsa da, keı kezde atalǵan úkim der kezinde oryndalmaı jatady. Sonyń saldarynan xalyqtyń sot júıesine, jalpy memleketke degen senimi tómendeıdi. Óıtkeni adamnyń sotqa jazǵan barlyq máseleleri qaǵaz júzinde ǵana qalady.
«Búginde sot oryndaýshynyń áreketine shaǵym túsirý tetigi bar. Atalǵan sharalar sot arqyly júrgiziledi. Dál osy máseleniń saldarynan kóptegen sot sheshimderin oryndaý jumysy uzaqqa sozylyp ketedi. Bylaısha aıtqanda, jaýapqa tartylyp otyrǵan adam osy tetikti paıdalanyp, úkimdi oryndaýdy bir aıǵa emes, birneshe jylǵa uzarta alady. Máselen, Atyraý oblysynda bir kisi zańsyz qurylysty buzý týraly sottyń oń sheshimin aldy. Alaıda jaýapqa tartylǵan adam sot oryndaýshysynyń áreketine 20 (!) ret shaǵym túsirip, sot sheshimin oryndaýdy ádeıi sozyp otyrǵan. Sóıtip, 2014 jyly shyǵarylǵan sheshim 2018 jyldyń jazynda ǵana oryndaldy. Sot sheshimin oryndaý jumysy tórt jylǵa sozyldy», - dedi E.Ibraev Astanada ótken «dóńgelek ústelde».
Onyń sózine qaraǵanda, Azamattyq-protsessýaldy kodekse ózgeris engizip, sot oryndaýshysynyń áreketine shaǵym túsirýdiń naqty sebepterin kórsetý kerek. Sonda jaýapqa tartylǵan adam sot úkimin oryndaýdy jaıdan-jaı tejeı almaıdy.
Aıta keteıik, búgingi jıynǵa QR Joǵarǵy sot sýdıasy Ulbolsyn Súleımenova da qatysty. Ol jumys berýshiden jalaqy qaryzdaryn óndirý boıynsha mańyzdy bir máselege toqtaldy. Búginde tıisti qujattardy jyldam alýǵa bolady. Ol úshin sotqa júginýdiń qajeti joq. Sebebi atalǵan másele notarıýstardyń quziretine de berilgen.
«Kúni keshe Memleket basshysy eńbek qatynastary salasyndaǵy daý-daımaılarǵa basa nazar aýdaryp, jalaqy boıynsha qaryzdardy óndirý máselesin kóterdi. Osy oraıda aıta keter jáıt, búginde biz jalaqy qaryzdaryn óndirý sharalaryn oryndaý jazbasyna aýystyrdyq. Ony notarıýstar arqyly jasaýǵa bolady. Osynyń arqasynda xalyq jalaqy qaryzdary boıynsha barlyq máselelerdi jyldam sheshe alady. Sebebi búginde kez kelgen aýlada notarıýs bar. Eń bastysy, qajetti qujattar bolýy qajet. Jalaqynyń jazylǵanyn, ol adamnyń naqty jumys istegenin jáne aqshanyń berilmegenin dáleldeıtin qujattar bolsa, notarıýs oryndaý jazbasyn rásimdep beredi. Sosyn notarıýstar da osy máselege úlken jaýapkershilikpen qaraýǵa tıis. Oryndaý jazbasyna qajetti qujattar jetpeı jatsa, adamdy jaı qaıtara salmaı, aqyl-keńes berý kerek, naqty qandaı qujattardy ákelý kerektigin aıtqan jón», - dep atap kórsetti U.Súleımenova.