Sot otbasynyń shyrqyn buzǵan janjalqoıdy úıinen ýaqytsha shyǵara alady

<p>ASTANA. KAZINFORM — Sotqa otbasyndaǵy janjalqoıdy turǵyn úıden ýaqytsha shyǵarý quqyǵy berilmek. Bul týraly ІІM Ákimshilik polıtsııa komıteti tóraǵasynyń mindetin atqarýshy Renat Zýlhaırov aıtty.</p>

«2023 jylǵy 8 jeltoqsanda Prezıdenttiń Jarlyǵymen bekitilgen Adam quqyqtary jáne zańnyń ústemdigi salasyndaǵy is-qımyl josparyna sáıkes, bala quqyqtary jónindegi ýákilmen jáne Májilis depýtattarymen birlesip, áıelder men balalardyń quqyǵyn qorǵaý, sondaı-aq otbasy qundylyqtaryn ilgeriletý sharalaryn kúsheıtý jóninde zańnamalyq túzetýler ázirlendi. Densaýlyqqa qasaqana jeńil zııan keltirýdi jáne uryp-soǵýdy qylmystyq jaýapkershilikke tartý josparlanǵan. Quqyq buzýshynyń minez-qulqyna qoıylatyn erekshe talaptar aıasynda sotqa „agressordy“ turǵyn úıden ýaqytsha shyǵarý quqyǵy beriledi. Sondaı-aq, sot „agressordyń“ densaýlyq saqtaý uıymdarynda mindetti psıhokorrektsııalyq kýrstan ótýin mindetteýge quqyly», — dedi ol ortalyq kommýnıkatsııalar qyzmetindegi dóńgelek ústel barysynda.

Onyń atap ótýinshe, osyǵan uqsas minez-qulyqqa qoıylatyn erekshe talaptar Qylmystyq kodekstiń aıasynda da belgilenedi.

«Sonymen qatar, el Prezıdenti ІІM-de otbasylyq-turmystyq zorlyq-zombylyqqa qarsy kúres jónindegi mamandandyrylǵan bólimshe qurýdy tapsyrdy. Ol otbasyn qoldaý ortalyqtarymen, ÚEU-men jáne múddeli memlekettik organdarmen ózara is-qımyl jasaı otyryp, turmystyq zorlyq-zombylyq problemalaryn sheshýmen aınalysady», — dedi Renat Zýlhaırov.