Sot oryndaýshysy qandaı jaǵdaıda lıtsenzııasynan aıyrylady
«Mınıstrlik boryshkerlerdiń de, óndirip alýshylardyń da quqyqtaryn qorǵaý úshin júıeli jumys júrgizýde. «Atqarýshylyq is júrgizý týraly» Zańǵa 2020 jyly mańyzdy ózgerister engizildi. Olar boryshker men óndirip alýshynyń quqyqtaryn qorǵaýǵa, jeke sot oryndaýshynyń jaýapkershiligin kúsheıtýge baǵyttalǵan. Endi bir aı ishinde alıment óndirý jáne basqa da áleýmettik ister boıynsha belsendi jumys bolmaǵan jaǵdaıda sot oryndaýshysy lıtsenzııasynan aıyrylady. 2021 jyly osyndaı negizder boıynsha 19 jeke sot oryndaýshysy lıtsenzııasynan aıyryldy», - dedi ol.
Mınıstrdiń aıtýynsha, jeke sot oryndaýshy múlikti satqannan keıin basqa sot oryndaýshylardyń da shekteýlerin sheshýge mindetti boldy. Sonymen qatar endi sot oryndaýshysy boryshkerdiń elden shyǵýyn shekteýge mindetti. Buryn ol muny óz qalaýy boıynsha jasaı alatyn.
«Jumys isteıtin múgedek boryshkerden alıment óndirip alý tek onyń jalaqysynan ǵana júzege asyrylady. 2020 jylǵy jeltoqsanda Joǵarǵy sottyń «Sot aktilerin oryndamaǵany úshin jaýaptylyq týraly« normatıvtik qaýlysyna túzetýler engizildi. Bul ózgerister qasaqana tólemeýshilerdi qylmystyq jaýapkershilikke tartýdy aıtarlyqtaı jeńildetti. Ótken jyly alıment tólemegeni úshin 316 boryshker qylmystyq jaýapkershilikke tartyldy. Al 2019 jyly 62 boryshker jaýapqa tartylǵan edi. 2021 jyly 6 myńnan astam boryshker ákimshilik jaýapkershilikke tartylyp otyr», - dedi Qanat Mýsın.