Sot málimetterine qoljetimdilikti qamtamasyz etýde kóptegen ózgerister bar - «Ádil sóz» qorynyń prezıdenti

ASTANA. 28 qazan. QazAqparat /Aıdar Ospanalıev/ - «Ádil sóz» halyqaralyq sóz bostandyǵyn qorǵaý qorynyń prezıdenti Tamara Kaleevanyń pikirinshe, búginde sot bıligi men buqaralyq aqparat quraldary arasyndaǵy qarym-qatynas pen sot bıliginiń ádildigin qamtamasyz etýde kóptegen ózgerister bar.

Bul pikirin qor prezıdenti búgin Astanada ótip jatqan «Sot bıligi jáne buqaralyq aqparat quraldary» atty aımaqtyq semınar barysynda bildirdi.

Onyń paıymdaýynsha, sot qyzmetiniń ádildigine qol jetkizýde múldem problema joq deýge áli erte. Degenmen jýrnalıster qaýymy men sot bıliginiń yntymaqtastyǵy jetilip kele jatqandyǵyn aıtýymyz kerek. «Eń bastysy sot málimetterine degen qoljetimdilikti qamtamasyz etýdiń mańyzdylyǵyn Qazaqstannyń sýdıalar odaǵynyń túsinetini qýantady. Olar tipti buqaralyq aqparat quraldary qaýymdastyǵynyń qoldaýymen túrli bastamalar da kóterip júr», - dedi T.Kaleeva.

Onyń sózine qaraǵanda, memleketimizde sot málimetterine qoljetimdilik máselesin sheshý áli birshama ter tógýdi qajet etedi. «Bálkim bul rette zańnamalyq ózgerister, tájirıbelik ózgerister qajet bolar. Eń bastysy, bul rette de aıtarymyz, elimizdiń barlyq sottarynda baspasóz hatshylarynyń qyzmeti sot bıligi men aqparat quraldarynyń qarym-qatynasyna úlken ózgerister ákeldi. Alaıda ósip, jetilip otyrý úzdiksiz úderis. Sondyqtan bul máseleler ylǵı da bizdiń nazarymyzda bolady», - dedi qor prezıdenti.