Sot «Dıkıı Armanǵa» qatysty sot protsesine advokattardyń qatystyrylmaýyn joqqa shyǵardy

Áleýmettik jelide «Dıkıı Arman» degen laqap atpen tanymal Arman Jumageldıevtiń qylmystyq sot protsesine advokattardyń kirýine ruqsat bermegeni týraly aqparat paıda boldy. Sot onyń shyndyqqa janaspaıtynyn aıtty, dep habarlaıdy QazAqparat tilshisi.

Sottan málim etkendeı, protsestiń barlyq qatysýshysyna №72 mekeme ǵımaratyna kirý jáne ótý orny, baǵyty týraly aldyn ala habarlama jiberildi. Birqatar adam sottalýshylardy ákeletin qyzmettik kireberisten ótýge tyrysty.

Olarǵa mekemeniń negizgi baqylaý-ótkizý pýnkti arqyly kirý syzbasy qosymsha túsindirildi. Otyrys ashyq rejımde ótetindikten, noýtbýk, planshet jáne basqa qurylǵylardy paıdalanýǵa tyıym salynbaǵan.

Qurylǵylardy paıdalanýda tehnıkalyq másele týyndaýy múmkin, óıtkeni tergeý ızolıatorynda uıaly baılanys shektelgen.

«№ 72 mekemeniń ǵımaraty erekshe qorǵalatyn nysan bolǵandyqtan, aýmaqqa kirý kezinde jeke basyn kýálandyratyn qujat tekseriledi», - delingen Almaty sotynyń habarlamasynda.

Buǵan deıin Qaırat Qudaıbergen men «Dıkıı Armanǵa» qatysty qylmystyq is sotqa túskeni týraly jazǵan bolatynbyz.