Sot burynǵy energetıka vıtse-mınıstri Anatolıı Shkarýpany aqtady

QARAǴANDY. QazAqparat – Qaraǵandy qalasynyń Qazybek bı aýdandyq soty burynǵy energetıka vıtse-mınıstri Anatolıı Shkarýpany aqtap shyqty. Oǵan bıýdjet qarajatyn jymqyrǵany úshin aıyp taǵylǵan bolatyn. Búgin Sýdıa Janat Egemberdıeva jańa úkimdi oqydy, dep habarlaıdy QazAqparat tilshisi.

Eks energetıka vıtse-mınıstri Anatolıı Shkarýpa men «TKSh damytý qory» kompanııasynyń burynǵy basqarma tóraǵasy Qaısar Baıdaly men «ENERSO» kompanııasynyń dırektory Erlan Nábıevke qatysty úkimniń jarııalanýy úsh saǵattan astam ýaqytqa sozyldy. Qaraǵandy qalasy Qazybek bı aýdandyq sotynyń sýdıasy Janat Egemberdıeva 115 tomdy quraıtyn is materıaldaryn oqyp berdi.

Qylmystyq is materıaldaryn zerdelep, sottalýshylardan, jábirlenýshilerdiń ókilderinen, aıyptaý kýágerlerinen, sondaı-aq qorǵaýshylardan, sarapshylardan, mamandardan jaýap alyp, sot sottalýshylardyń áreketterinde qylmystyq quqyq buzýshylyq quramy joq degen qorytyndyǵa keldi.

«Sotqa deıingi tergep-tekserý organy aıyptaý aktisinde qylmystyq áreket jasaý tásilin, atap aıtqanda: urlaý qalaı jasalǵanyn – ıemdenip alý nemese jymqyrý arqyly ekenin kórsetpedi. Іs boıynsha júrgizilgen, is boıynsha keltirilgen zalal somasyn boljamdy rastaıtyn saraptamalardy sot olardy júrgizý tártibiniń eleýli buzylýyna, saraptamalardyń, sarapshylardyń, sondaı-aq mamandardyń qorytyndysyna baılanysty jol berilmeıtin dáleldeme dep tanydy. Olar shyndyqqa janaspady jáne olar keltirilgen shyǵyn mólsherin rastamady. Aıyptalýshylar arasyndaǵy qylmystyq qastandyq faktisi sot tergeýimen rastalǵan joq. Sot talqylaýy barysynda sottalýshylardyń kináliligi týraly jetkilikti jáne bultartpas dálelder alynǵan joq. Іs boıynsha júrgizilgen tergeý áreketterinde kináliliktiń dáleli joq. Jaýap alynǵan kýágerler sottalýshylardyń kinásin tikeleı nemese janama túrde rastamady», - dep túsindirdi Qaraǵandy qalasy Qazybek bı aýdandyq sotynyń sýdıasy Janat Egemberdıeva.

Sondaı-aq, sýdıa sot tergeýinde zalal somasy anyqtalmaǵanyn atap ótti. Bul qylmys quramynyń joqtyǵyn kórsetedi.

Aqtalǵandar tergeý organdaryna talap aryz berip, zańsyz qylmystyq jaýapkershilikke tartylǵany úshin moraldyq zııannyń ótelýin talap etýge quqyly.

Janat Egemberdıeva osy qylmystyq isti tergeý kezinde QІJK normalarynyń buzylýyna jol bergeni úshin Bas prokýratýraǵa qaýly shyǵardy.

Esterińizge sala keteıik, Energetıka vıtse-mınıstri Anatolıı Shkarýpa 2018 jyldyń 18 qarashasynda qamaýǵa alyndy. Oǵan jáne taǵy eki kúdiktige «Turǵyn úı-kommýnaldyq sharýashylyqty damytý qory» AQ Qaraǵandy oblysynyń Saran qalasynda jylý esepteý quraldaryn satyp alýǵa jáne ornatýǵa bólgen qarajatyn jymqyrdy dep aıyp taǵylǵan bolatyn.