Sot bólinbegen múlikti jarııa saýdaǵa shyǵaratyn bolady

ASTANA. QazAqparat - Qazaqstanda sot múlikti bólý múmkin bolmaǵan jaǵdaıda, ony jarııa saýdaǵa shyǵaratyn bolady. Bul týraly QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine azamattyq, bank zańnamasyn jetildirý jáne kásipkerlikti júrgizýdi jaqsartý máseleleri boıynsha ózgerister men tolyqtarýlar engizý týraly» Zań jobasyn tanystyrý barysynda QR Ádilet mınıstri Marat Beketaev málim etti, dep habarlaıdy QazAqparat.

«Zań jobasy taraptardyń kelisimi boıynsha múlikti bólý múmkin bolmaǵan jaǵdaıda, ony jarııa saýdaǵa salyp satý týraly sottyń sheshim qabyldaý mindetin belgileıdi. Atalǵan túzetý Qazaqstan Respýblıkasy Konstıtýtsııalyq Keńesiniń normatıvtik qaýlysynyń erejelerin oryndaý jáne jalpy menshik quqyǵyn, sondaı-aq daýly múliktiń menshik ıeleriniń quqyqtaryn qorǵaýdy kúsheıtý maqsatynda usynyldy.

Ekinshiden, zań jobasymen menshikten bas tartýdyń talaptary naqtylanady. Atap aıtqanda, menshikten bas tartýdyń talaptary retinde menshik ıesinniń erik bildirýi quqyqqa saı jáne eriktiligi kózdeledi. Sonymen birge, memleket jáne onyń organdarynyń menshik quqyǵynan bas tartýyna tyıym salynady»,-dedi mınıstr.

Atalǵan sharalar sot jáne quqyq qoldaný tájirıbesinde ártúrli maǵynaly túsinýdi joıady, sondaı-aq menshik quqyǵyn qorǵaýdy kúsheıtedi.

Sonymen qatar qujatta jan azaby nemese tán azaby saldarynan qaıtys bolǵan azamattardyń týystarynyń quqyqtaryn qamtamasyz etý maqsatynda zań jobasymen olardyń moraldyq zııandy óteý quqyǵy belgilenedi. 

«Zań jobasy jaramsyz mámilelerdi daýlanatyn jáne mánissiz mámilelerge zańnamalyq negizde bólýdi usynady.  Atalǵan jikteý sharttyq qatynastardyń turaqtylyǵyn jáne mámile jasasý barysynda quqyq buzýshylyqtardy boldyrmaý tártibin sot rásimin ótkizbeı ońaılatýdy qarastyrady. Bul taraptardyń ýaqyttyq jáne materıaldyq shyǵyndaryn edáýir azaıtady»,-dedi Beketaev.