Sońǵy jyldary jún eksporty 3,8 esege ósti
«Júnge eksporttyq bajdy joıý bóliginde 2023 jylǵy 30 sáýirge deıin júndi áketýge baj alynyp tastalǵanyn atap ótemiz. Máselen, sońǵy jyly eksporttalǵan júnniń jalpy kólemi 3,8 esege ósip, 7 myń tonnany qurady (Qytaı men Reseı). Qazaqstanda jumys istep turǵan 10 kásiporynnyń 4-ýi bııazy júndi óńdeýge múmkindigi bar, qalǵan kásiporyndar – bul etik óndirý fabrıkalary. Qosymsha, iri júndi qaıta óńdeý maqsatynda Aqtóbe oblysynda qýaty 3 myń tonna jún jylytqyshtar óndirý boıynsha «KazFeltec» JShS jobasyn iske asyrý bastaldy. Bııazy júndi qaıta óńdeý boıynsha jalpy qýaty 154 tonna ıirimjip jáne 465 myń sharshy metr mata bolatyn 2 áleýetti «Shymkent Kashemır» jáne «POSh Taraz» jobalary bar. Tutastaı alǵanda, salany qarjylyq qoldaý sharalary kásipkerlikti damytý jónindegi 2021 – 2025 jyldarǵa arnalǵan ulttyq joba aıasynda júzege asyrylady», - dep atap ótedi Baqyt Sultanov jaýabynda.
Onyń dereginshe, isin jańa bastaǵan kásipkerler úshin sońǵy qaryz alýshyǵa 6 paıyz mólsherlememen jeńildikti mıkrokredıt (kredıttiń eń joǵary somasy - ınvestıtsııalarǵa 20 mln teńge jáne aınalym qarajatyn tolyqtyrýǵa 5 mln teńge) berý kózdelgen. Jetkilikti kepildik qamtamasyz etý bolmaǵan jaǵdaıda kredıt somasynyń 85 paıyzyna deıingi mólsherde kepildik beriledi. Bul rette 5 mln teńgege deıingi somadaǵy kredıtter úshin kepilmen qamtamasyz etý talap etilmeıdi.
«Sondaı aq ınvestıtsııalyq salymdar kezinde agroónerkásiptik keshen sýbektisi shyǵystarynyń bir bóligin óteý boıynsha sýbsıdııalaý qaǵıdalary aıasynda jańa kásiporyndardy salý jáne jumys istep turǵandaryn jańǵyrtý kezinde aýyl sharýashylyǵy janýarlarynyń júni men terisin bastapqy qaıta óńdeý boıynsha kásiporyndardyń shyǵyndaryn óteý kózdelgen. Budan basqa, sýbsıdııalaý qaǵıdalary aıasynda jún daıyndaý pýnkti úshin jabdyq satyp alý qunynyń 25 paıyzyna deıin shyǵyndardy óteý qarastyrylǵan», - dedi Úkimet basshysynyń orynbasary.
Foto: mongolka.store