Sońǵy jyldary Jaıyq ózeniniń aǵyny 3 ese qysqardy – Ekologııa mınıstri

NUR-SULTAN. QazAqparat – Sońǵy jyldary Jaıyq ózeniniń aǵyny 3 ese qysqardy. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Klımattyń ózgerý saldaryn búginnen-aq sezip jatyrmyz. Qazaqstanda ortasha jyldyq aýa temperatýrasy sońǵy 100 jyldyń ishinde 1,37 gradýsqa kóterildi. Bul rette ortasha jyldyq temperatýranyń kóterilý jyldamdyǵy turaqty túrde ósip kele jatqany baıqalady», - dedi mınıstr «ECOJER» halyqaralyq kongresi barysynda.

Onyń atap ótýinshe, munyń barlyǵy sý resýrstary problemasyna alyp keledi.

«Óıtkeni, Qazaqstan kóptegen transshekaralyq ózenderdiń tómengi aǵysynda ornalasqan. Qazaqstanǵa sý resýrstarynyń 40 paıyzdan astamy kórshi elderden keledi. Jaıyq ózeni aıqyn dálel bola alady. Sońǵy jyldary onyń ortasha jyldyq aǵyny úsh esege qysqaryp otyr», - dedi Maǵzum Myrzaǵalıev.