Sońǵy jyldary dýaldy bilim júıesimen oqıtyn kolledj stýdentteriniń sany eki ese artty

NUR-SULTAN. QazAqparat - Sońǵy 2,5 jylda dýaldy oqytý júıesi boıynsha bilim alatyn kolledj stýdentteriniń sany eki ese ósti, dep habarlaıdy QazAqparat.

Bul júıeni engizýdiń arqasynda stýdentterdiń praktıkalyq bilim alýyna basa nazar aýdarylady.

Kolledjder stýdentterge zaýyttar men fabrıkalarda oqýǵa múmkindik beretin kásiporyndarmen yntymaqtastyq ornatady.

Oqytýdyń bul formaty praktıkalyq jumys tájirıbesi bar bilikti jáne suranysqa ıe mamandardy daıyndaýǵa múmkindik beredi.

Bıyl Qazaqstanda dýaldy oqytý júıesiniń engizilgenine 10 jyl tolǵanyn atap óteıik. Búgingi kúni bul júıe elimizdiń 536 kolledjinde jumys isteıdi.

Osy formattaǵy kadrlardy daıarlaý 15 baǵyt aıasynda 166 mamandyq jáne 445 biliktilik boıynsha júzege asyrylady: metallýrgııa, qurylys, aýyl sharýashylyǵy, óndiris jáne montajdaý, servıs, ekonomıka, kólik jáne t.b.

«Dýaldy oqytý júıesi bilim berý uıymdaryndaǵy teorııalyq oqytýdyń 40%-yn jáne óndiristegi oqý tájirıbesiniń keminde 60%-yn qamtıdy. Byltyr normatıvtik-quqyqtyq aktilerge ózgerister engizilip, endi stýdenttiń óndiristik tájirıbeden ótken ýaqyty onyń eńbek ótiline esepteledi. Ortasha alǵanda, bul 6 aıdan 1,5 jylǵa deıin. Bul túlekterdiń jumysqa ornalasý múmkindikterin arttyrady jáne olar burynnan bar jumys tájirıbesimen jumysqa ornalasa alady. Sonymen birge keıbir kásiporyndar stýdentterge óndiristik tájirıbeden ótý kezinde jalaqy tóleıdi. Mysaly, Petropavl mashına jasaý jáne kólik kolledji stýdentteriniń 60%-dan astamy dýaldy oqytý aıasynda naqty oryndaǵan jumystary úshin jalaqy alady. 2021 jyly stýdentterdiń ortasha jalaqysy 58 000 teńgeni qurady», - dedi QR BǴM Tehnıkalyq jáne kásiptik bilim departamentiniń dırektory Nasymjan Ospanova.

Jumys berýshilerdiń dýaldy oqytýǵa qatysýyn yntalandyrý úshin TjKB uıymdaryn jan basyna shaqqandaǵy qarjylandyrýynyń jańa ádistemesi ázirlendi.

ıAǵnı jumys berýshilerdiń dýaldy oqytýǵa jumsaıtyn shyǵyndary óteledi, sondaı-aq kásiporyndarda stýdentterdi oqytatyn tálimgerler de eńbegi úshin aqy alady.

Aıta keteıik, búginde qazaqstandyq kolledjderge akademııalyq erkindik berilgen. TjKB uıymdary jumys berýshilermen birlesip oqý baǵdarlamalaryn ázirleıdi, bilim berý baǵdarlamalarynyń mazmuny men oqytý merzimin ózderi anyqtaıdy.

Olar sondaı-aq eńbek naryǵynyń qajettilikterine sáıkes baǵdarlamalardy derbes qaıta qaraıdy.