Sońǵy úsh jylda Qazaqstannyń zııatkerlik menshik quqyǵy salasyndaǵy kórsetkishi 42 tarmaqqa joǵarylady

ASTANA. QazAqparat - 2011 jyldan beri Qazaqstan zııatkerlik menshik quqyǵy salasyndaǵy kórsetkishin 42 tarmaqqa jaqsartty. Búgin Parlament Májilisinde ótip jatqan Úkimet saǵatynda QR Ádilet mınıstri Berik Imashev osylaı málim etti.

«Qazaqstan Jahandyq básekege qabilettilik ındeksiniń «Zııatkerlik menshikke quqyqty qorǵaý» ındıkatory boıynsha 2011 jyldan beri óziniń kórsetkishin 42 tarmaqqa jaqsartyp, 116-shy orynnan 74-shi orynǵa kóterdi. Bul rette elimiz Ispanııa, Brazılııa, Reseı, Grýzııa sekildi memleketterdiń aldyna shyǵyp otyr. Aıta keterligi, mundaı kórsetkish kontrafaktini anyqtaý men onyń aldyn alý boıynsha qabyldanǵan sheshim esebinen qalyptasqan», - dedi B.Imashev.

Mınıstrdiń aıtýynsha, Qazaqstanda jańa ıntegratsııalyq jaǵdaıda júzege asyp jatqan ákimshilik-quqyqtyq reformany esepke alsaq, bul ındıkatorlardy jaqsartý negizinen kontrafaktimen kúres jónindegi quqyq qorǵaý organdary tarapynan jasalatyn tıimdi áreketterge tikeleı baılanysty.

Toqtala ketetin jaıt, 1993 jyldan beri Qazaqstan Dúnıejúzilik Zııatkerlik menshik uıymynyń qatysýshysy bolyp tabylady.