Sońǵy úsh aıda otyzǵa jýyq jolserik jumystan shyǵaryldy
Bul týraly "Jolaýshylar tasymaly" AQ bas dırektorynyń orynbasary Danııar Nurmaǵambetov Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken keńeste málim etti.
"Kompanııanyń revızııalyq bólimi poıyzdarǵa tekserý júrgizip turady. Alty aıta bes myńǵa jýyq tekserý jumystary júrgizildi. Nátıjesinde bıletsiz jolaýshylar men rásimdelmegen júk tasymalynyń 335 oqıǵasy anyqtaldy", - dedi Danııar Nurmaǵanbetov.
10 sáýirden beri zańbuzýshylyqtardan 29 adam jumystan shyǵarylǵan, onyń ekeýi poıyz basshysy bolsa, 27-si - jolserik. 40 qyzmetkerge eskertý jarııalanyp, taǵy 44 qyzmetkerge qatań eskertý jarııalanǵan.
Sondaı-aq, anyqtalǵan zańbuzýshylyqtar úshin qyzmetkerlerdiń laýazymyn tómendetý jazasy qoldanylǵan.
"Tekserý jumystarynan keıin 7 poıyzdyń basshysy jolserik laýazymyna túsirildi, al eki jolserik poıyz jabdyqtaýshysy bolyp aýystyryldy. Munda tekserý reglamentine basa mán berdik, ıaǵnı jazǵy maýsymnyń keletinin eskerip, sáýir aıynda tekserý jumystaryn bastap kettik", - dedi Danııar Nurmaǵanbetov.
Keńeske jetekshilik etken Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov máseleni túbegeıli sheshetin usynystar surady.
"Jumys istep jatqandaryńyzdy eshkim joqqa shyǵarmaıdy. Biraq, nátıjesi kózge kórinip tur. "Jasyryn satyp alýshylarymyz" zańsyz bılet satylymy týraly beıneaıǵaqtar ákeldi. Tekserý jumystaryn júrgizgenderińiz jaqsy, biz de barynsha kómek kórseteıik dep qosylyp jatyrmyz. Demek, sizder júrgizgen sharalar tıimsiz bolyp otyr. Sizder osy salanyń mamany bolǵandyqtan, barlyǵynan habardar bolyp otyrsyzdar. Máseleni júıeli túrde sheshetin usynystar kútemiz", - dedi Oljas Bektenov.