Sońǵy táýlikte Qaraǵandy oblysynda birneshe tabıǵı órt boldy

QARAǴANDY. QazAqparat – Qaraǵandy oblysynyń órt sóndirýshileri ótken táýlikten beri Shet aýdanyndaǵy tabıǵı apatpen kúresip jatyr, dep habarlaıdy QazAqparat tilshisi.

«5 qyrkúıek kúni saǵat 09:28-de Shet aýdanynyń Qyzyltaý aýyldyq okrýginde, Qyzyltaý aýylynan ońtústikke qaraı 15 km jerde aldyn ala boljam boıynsha 300 ga alańda qurǵaq shóp órtendi. Órtti sóndirýge Tótenshe jaǵdaılar departamentiniń (7 qyzmetkeri men 2 tehnıkasy) kúshi jáne erikti jasaqtar (quramynda 40 jumysshy jáne 17 tehnıka – tıegish, Ýral júk kóligi, 5 jeńil avtomobıl jáne 10 mototsıkl bar) jumyldyryldy», - dep habarlady Qaraǵandy oblysy TJD baspasóz qyzmetinen.

Sondaı-aq búgin qutqarýshylar Qaraǵandy mańyndaǵy Saran tasjoly boıynda qurǵaq shópten tutanǵan otty sóndirdi.

«6 qyrkúıek saǵat 13:37-de Saran tasjoly-8 kóshesiniń janynda shamamen 2 ga alańda qurǵaq shóp janyp ketti, zardap shekkender men qaza tapqandar joq. Qurǵaq aýa raıy men qatty jel jalyndy sóndirýge kedergi keltirdi. Jalyn 17:57-de aýyzdyqtaldy. Órtti joıýǵa Qaraǵandy oblysynyń TJD 40 adamy men 11 tehnıkasy jáne «TazalykEkspert» JShS tartyldy», - dep habarlady vedomstvodan.

Vıdeodan alynǵan kadr