Sońǵy on jylda bekire tuqymdas balyqtar 98 paıyzǵa azaıǵan – Bas prokýratýra
Bas Prokýror atap ótkendeı, Jaıyq-Kaspıı basseınindegi balyq qorlaryn qorǵaý jáne paıdalaný máseleleri jóninde 2010 jyly Atyraý qalasynda ótkizilgen vedomstvoaralyq jınalystan keıingi úsh jyldyń ishinde osy saladaǵy jaǵdaı nasharlaı túspese, jaqsarǵan joq.
"Qalyptasqan jaǵdaı, eń aldymen, ýákiletti organdar qyzmetiniń tıisinshe uıymdastyrylmaı otyrýynyń saldary. Ázirge kóbinese formalızmge jol berilýde. Jaıyq-Kaspıı oblysaralyq basseındik ınspektsııasy qyzmetiniń tıimdiligi óte tómen bolyp otyr. Mysalǵa, balyq ınspektsııasynyń birqatar bólimderiniń ınspektorlary ótken jyldyń basynan beri brakonerlikpen baılanysty bir de bir qylmysty anyqtamaǵan», - dep atap ótti Bas prokýror.
Al keıbir málimetter boıynsha, zańsyz balyq aýlaý óndiristik qarqynǵa ıe bolǵan. Bul bekire tuqymdastary popýlıatsııasy sanynyń asa úlken qarqynmen qysqarýyna alyp kelgen.
A. Daýylbaevtyń keltirgen málimetteri boıynsha, sońǵy úsh jylda Atyraý oblysynda zańsyz aınalymnan 440 tonna balyq alyndy, olardyń arasynda 12 tonna bekire tuqymdas balyqtar, 318 kg ýyldyryq bar, 8700 aýlaý quraldary alyndy.
Tabıǵatty qorǵaý prokýratýrasynyń qyzmetkerleri Atyraý - Astrahan tas jolynda bıylǵy jyldyń qańtarynda zańsyz aýlanǵan balyqtyń 16 tonnasy tıelgen avtokólikti ustady. Atyraý - Dossor tas jolynda jalǵan qujattary bar 11 tonna balyq tıelgen KamAZ kóligi ustaldy. Alaıda oblystyq ІІD brakonerlik faktisi boıynsha qozǵaǵan 215 qylmystyq istiń besten bir bóligi ǵana sotqa joldanǵan.
"Álsiz vedomstvolyq baqylaý, qylmystyq balyq bıznesiniń joǵary tabystylyǵy jaǵdaıynda uıymdasqan toptardyń qylmystyq shemasyna kóbinese brakonerlerge kómek kórsetýshi ártúrli memlekettik organdardyń qyzmetkerleriniń aralasýy qalyptasqan jaǵdaıdy ýshyqtyra túsedi», - dedi A.Daýylbaev.