Sońǵy qońyraý sharasy mınıstrlik buıryǵymen bekitilmeıdi - vedomstvo basshylyǵy

ASTANA. QazAqparat – Mektepterdegi sońǵy qońyraý sharasy mınıstrlik buıryǵymen bekitilmeıdi. Oqý-aǵartý mınıstriniń birinshi orynbasary Sholpan Karınova bıylǵy sońǵy qońyraý kúnine qatysty máseleni taǵy bir márte túsindirdi, dep habarlaıdy QazAqparat tilshisi.

«Bıyl oqý jyly 31 mamyrda aıaqtalady. Sońǵy qońyraýǵa kelsek, atalǵan sharany ótkizý buryn da, qazir de mınıstrliktiń buıryǵymen bekitilmegen. Demek, normatıvtik quqyqtyq qujattarda sońǵy qońyraý dástúri jeke is-shara retinde qarastyrylmaǵan», - dedi Sholpan Karınova OKQ-de ótken brıfıngide.

Eske salaıyq, Májilistiń jalpy otyrysynda depýtat Amanjol Áltaı mektepterdegi sońǵy qońyraý kúnin 30 mamyrǵa nemese 1 maýsymǵa aýystyrýdy suraǵan edi.

Munan soń mınıstrlik sońǵy qońyraý sharasynyń 1 maýsymda ótetindigin habarlady.

«Qazaqstanda oqý jylynyń uzaqtyǵy 36 apta. Dástúr boıynsha oqý jyly 1 qyrkúıekte bastalyp, bıyldan bastap 31 mamyrda aıaqtalady. 31 mamyr – oqý jylynyń sońǵy kúni. Bul kúni elimizdiń mektepterinde oqýshylardyń jas erekshelikterin eskere otyryp, Saıası qýǵyn-súrgin qurbandaryn eske alý kúnine arnalǵan synyptan tys saǵattar ótkiziledi. 1 maýsymda elimizdiń oqýshylary halyqaralyq balalardy qorǵaý kúnimen qatar sońǵy qońyraý merekesin atap ótedi», - dep túsindirgen edi sol kezdegi Oqý-aǵartý mınıstrligi Orta bilim komıtetiniń tóraǵasy Gúlmıra Kárimova.