Sońǵy kezde túsirilgen tarıhı fılmderdiń olqylyqtary kóp – Prezıdent

ASTANA. QazAqparat – Sońǵy kezde túsirilgen tarıhı fılmderdiń olqylyqtary kóp. Bul jaıynda Túrkistanda ótip jatqan Ulttyq quryltaıdyń «Ádiletti Qazaqstan – Adal azamat» atty ekinshi otyrysynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Kınoındýstrııany ekonomıkanyń jeke tarmaǵy retinde qarastyryp, máselelerdi naqty sheshken jón. Ásirese, kınogerler men kınoteatrlardyń arasyndaǵy qarym-qatynasta eki jaqtyń da múddesin teńdeı eskerý qajet. Sonda jańa keıipker, tarıhı qaharman, mańyzdy oqıǵalar jaıly fılmderdi tek «Qazaqfılm» emes, jeke kompanııalar da túsiredi. Óskeleń urpaq sheteldiń keıipkerine emes, óz batyrlarymyzǵa qarap boı túzeıtin bolady», - dedi Prezıdent.

Memleket basshysy kezinde shyqqan «Qyz Jibek», «Otyrardyń kúıreýi», «Atamannyń aqyry» sııaqty klassıkalyq fılmder túsirilýi kerek dep sanaıtyndyǵyn basa aıtty.

«Sol kezde shyǵarmashylyq erkindik, mol qarajat jáne kompıýterlik grafıka da bolǵan joq. Degenmen, fılmder túsirildi, áli kúnge deıin halyqtyń júreginen oıyp turyp oryn alady. Shynyn aıtýymyz kerek, sońǵy kezde túsirilgen tarıhı fılmderdiń olqylyqtary kóp. Sol úshin mamandarmen aqyldasyp, jalpy kıno salasyn reformalaý kerek», - dedi Qasym-Jomart Toqaev.