Sońǵy bir aıda turǵyn úı naryǵyndaǵy baǵa qalaı ózgerdi

ASTANA. QazAqparat - Bir jylda (2022 jylǵy qarasha 2021 jylǵy qarashaǵa) páterlerdi qaıta satý baǵalary – 26,9%, jańa turǵyn úılerdi satý 17,3% ósti. Abattandyrylǵan turǵyn úıdi jalǵa alý tólemi ótken jylǵy tıisti aımen salystyrǵanda bıylǵy qarashada 48,6% artty, dep habarlaıdy Ulttyq statıstıka bıýrosynyń baspasóz qyzmeti.

Óńirler bólinisinde jyldyq mánde jańa úıler baǵasy Aqtóbe – 30,3%, Semeı – 26,9%, Aqtaý – 25% qalalarynda qymbattady. Qoldanystaǵy páter naryǵy saýdasyndaǵy baǵa ósimi boıynsha tizimdi – Taldyqorǵan (44,6%), Aqtaý (43,3%), Semeı (42,8%), Aqtóbe (42,4%), Astana (41,7%), Qyzylorda qalalary bastap tur (41,2%), al turǵyn úıdi jalǵa alý naryǵyndaǵy joǵary qymbattaý Almaty (76,6%), Qaraǵandy (55,7%), Qostanaı qalalarynda (54,5%) kórinis tapty.

Bir aıdyń ishinde (2022 jylǵy qazannan 2022 jylǵy qarashaǵa deıin) qoldanystaǵy páterlerdi qaıta satý baǵasy – 1%, jańa turǵyn úıdi satý 1,2% ósti. Abattandyrylǵan turǵyn úıdi jalǵa alý tólemi aldyńǵy aımen salystyrǵanda qarashada 2,4% tómendedi.

«QR SJRA Ulttyq statıstıka bıýrosy turǵyn úı baǵasy boıynsha aı saıyn monıtorıng júrgizedi. Baǵa ındeksteri oblys ortalyqtary men Astana, Almaty, Shymkent qalalary boıynsha iriktep baıqaý derekteri negizinde qalyptastyrylady. Jańa turǵyn úıler boıynsha aqparatty biz satý boıynsha operatsııalar júrgizetin qurylys kompanııalarynan jınaımyz, bul rette páterdiń bastapqy jáne taza árlengendegi baǵasy eskeriledi. Páterlerdi qaıta satý jáne jalǵa alý boıynsha derekter ınternette, buqaralyq aqparat quraldarynda ornalastyrylatyn habarlandyrýlar negizinde jınalady. Baǵalardy esepteý kezinde bir, eki, úsh bólmeli páterler boıynsha usynystar esepke alynady», – deıdi QR Ulttyq statıstıka bıýrosynyń baǵa statıstıkasy departamentiniń dırektory Qýanyshbek Jaqypbekuly.