Sońǵy bes jylda Qazaqstanda adam saýdasynyń 600-ge jýyq qurbany anyqtalǵan

ASTANA. 29 sáýir. QazAqparat - Búgin Bas prokýratýrada Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý Keńesiniń kezekti otyrysy ótip, onda adam saýdasymen baılanysty qylmystardy anyqtaý máseleleri qaraldy. Bul týraly Bas prokýratýranyń baspasóz qyzmetinen habarlandy.

Keńestiń jumysyna Úılestirý Keńesiniń músheleri, Іshki ister mınıstrligi, Ádilet mınıstrligi, Kóshi-qon polıtsııasy komıteti, halyqaralyq jáne úkimettik emes uıymdardyń jetekshileri qatysty.

Bas prokýror atap ótkendeı, adam saýdasy qoǵamdyq qaýiptiń joǵary deńgeıine ıe bolyp otyrǵan qazirgi kezde ótkir máseleleriniń biri bolyp otyr. Statıstıkalyq málimetter kórsetip otyrǵandaı, sońǵy bes jyl ishinde Qazaqstanda adam saýdasynyń 600-ge jýyq qurbany anyqtalǵan. Quqyq qorǵaý organdary adam saýdasymen baılanysty 1,5 myńǵa jýyq qylmys anyqtady, 800-den astam adam sottaldy. Jyl saıyn osy sanattaǵy 300-ge jýyq qylmys tirkeledi.

Ashat Daýylbaev atap kórsetkendeı, atqarylyp otyrǵan jumystyń tıimdiligi jetkiliksiz, adam saýdasy faktilerin anyqtaý, eskertý jáne jolyn kesý, qylmys qurbandarymen jumys tásilderin ózgertý qajet.

Úılestirý Keńesiniń músheleri osy saladaǵy qalyptasqan jaǵdaıdy taldady, múddeli memlekettik organdardyń vedomstvoaralyq ózara is-qımylyn arttyrý, adam saýdasymen baılanysty qylmystardy anyqtaý, qylmys qurbandaryna kómek kórsetýdiń tıimdi tetikterin jasaý, tutastaı alǵanda azamattardyń quqyqtary men bostandyqtarynyń kepildigin kúsheıtý boıynsha naqty usynystar jasady.

A.Daýylbaev adam saýdasymen baılanysty qylmystardyń profılaktıkasyn kúsheıtý aıasynda eńbek jáne ózge salalardaǵy qanaýǵa túsý qaýiptiligi týraly halyqty keńinen aqparattandyrý jolymen aqparattyq-nasıhattyq jumystyń belsendiligin arttyrýdy tapsyrdy. Sondaı-aq ol barlyq uıaly baılanys operatorlary úshin kúni-túni tegin jumys isteıtin «11616» senim telefonynyń jumysyn jolǵa qoıýdy tapsyrdy.

Jınalysqa qatysýshylar quqyq qorǵaý organdarynyń adam saýdasyna tosqaýyl qoıý salasynda jumys isteıtin úkimettik emes jáne qoǵamdyq uıymdarmen ózara is-qımyldyń belsendiligin arttyrý mańyzdylyǵyn atap kórsetti. Atap aıtqanda, Halyqaralyq kóshi-qon uıymymen yntymaqtastyq týraly memorandým jasasý qajettiligi týraly másele talqylandy. Adam saýdasynyń qurbandaryna arnalǵan qoǵamdyq uıymdar men baspanalarǵa qarjylyq jáne uıymdastyrýshylyq qoldaý kórsetýge oblys ákimderiniń nazary aýdaryldy.

Sondaı-aq, TMD qatysýshy-memleketteriniń Adam saýdasyna qarsy kúres jónindegi yntymaqtastyq baǵdarlamasyn júzege asyrý aıasynda Dostastyq elderiniń quziretti organdarymen zańsyz adam trafıgine qatysty áreket etýshi qylmystyq toptar týraly aqparat almasý jáne tájirıbelik ózara is-qımyl jasasýdy jaqsartý boıynsha birqatar sharalar qabyldaý, birlesken jedel-izdestirý jáne profılaktıkalyq is-sharalar ótkizýdi keńinen qoldaný usynyldy.