Sońǵy bes jylda ata-anasy bas tartqan bóbekter sany 70 paıyzǵa azaıǵan
«Analar úıi» jobasynyń basty nátıjesi - 2013 jyldan beri perzenthanada týyp, ata-anasy bas tartatyn, osydan keıin Balalar úıine túsetin balalardyń sany 68 paıyzǵa azaıdy. Eger 2013 jyly bul kórsetkish 800 bolsa, qazirgi ýaqytta 310 bolyp otyr», - deıdi «Analar úıi» Qoǵamdyq qorynyń dırektory Balııa Ákimbekova.
Ol bul kórsetkishke úkimettik emes uıymdardyń arqasynda qol jetkizilgenin atap ótti.
«Ata-anasy bas tartqan balalardyń sany azaıyp kele jatqanyn baıqadyq. Eń aldymen, jas analarǵa otbasy bolýǵa jeter baqyt joq ekenin barynsha nasıhattaǵymyz keledi», - deıdi ol.
Balııa Ákimbekovanyń sózine qaraǵanda, qordyń negizgi mindeti - ata-analardyń týǵan balasyn perzenthanada tastap ketý jaǵdaıynyń aldyn alý.
«Dabyl túskennen keıin bizdiń psıhologtar birden sol anaǵa baryp, jumys júrgizedi. Eger jas ana balasynan báribir bas tartatynyn aıtsa, biz olarǵa «Analar úıinde» turyp, óz balasyn aıalap ósirýdi usynamyz. Mine, dál osy kezde ana oılanýy múmkin. Ol balany kúndelikti kútip-baqqannan keıin oǵan baýyr basyp, jaýapkershilikti sezinetin bolady», - deıdi ol.
«Analar úıi» qorynyń dırektory naqty qaı sanattaǵy adamdar kelip jatatynyn aıtyp berdi.
«Biz bul rette arnaıy taldaý júrgizdik. «Analar úıine» balalar úıiniń burynǵy tárbıelenýshileri, tolyq emes otbasynda ósken, zorlyq-zombylyqqa tap bolǵan boıjetkender kelip jatady», - deıdi ol.