Sońǵy 8 jylda Qazaqstanda adam saýdasynan 800-den astam jábir kórýshi tirkeldi

ASTANA. 6 qyrkúıek. QazAqparat - Sońǵy 8 jylda Qazaqstanda adam saýdasynan 858 jábir kórýshi tirkeldi. Bul týraly búgin Astanada adam saýdasymen kúres máselelerine arnalǵan quqyq qorǵaý organdary men ÚEU arasyndaǵy ulttyq dıalog barysynda Kóshi-qon boıynsha halyqaralyq uıymy baǵdarlamalarynyń ulttyq úılestirýshisi  Álııa Alıkova aıtty.

Sonymen qatar atalǵan málimettiń ishindegi jábirlenýshilerdiń birshama bóligi el aýmaǵynan tys jerlerde anyqtalyp, Otanyna qaıtarý úshin uıymǵa tapsyryldy. Osy oraıda Á. Alıkova jábirlenýshilerdiń 90 paıyzǵa jýyǵy respýblıka aýmaǵynda qalatynyn jekizdi.

«Osy kórsetkishte adam saýdasynan el ishinde zardap shekken Qazaqstan azamattarymen qatar, elimizge kelip, keıinnen osynda quldyqta túsip qalatyn kórshiles respýblıkalardyń azamattary da qamtylǵan»,-dedi úılestirýshi.

Atalǵan uıymnyń málimetinshe, Qazaqstan aýmaǵynda Ortalyq Azııa azamattarynan basqa sońǵy kezde Reseı jáne Qytaı azamattary da paıdalanylady. Osyndaı alǵashqy oqıǵa byltyr Kókshetaýda tirkelgen eken. Kóbinese olar qara jumysqa salynatyn kórinedi.

Al Qazaqstannan ózge elderge  adam saýdasy qursaýyna túsken qalǵan 10 paıyzǵa jýyq jábir kórýshi kóbinese Túrkııa, BAÁ, Izraıl, Taıland, Germanııa, Qytaı, Ózbekstan, Grekııa jáne Lıvan memleketterine tıesili.

«Sońǵy kezde biz Qazaqstan azamattary seksýaldyq nemese jumysqa salý arqyly paıdalaný úshin shetelge shyǵarylmaı júrgenin baıqap otyrmyz. Qazaqstan azamattaryn el ishinde paıdalanady»,-dep túıindedi ol.