Sońǵy 5 jylda Qazaqstanda ana ólimi 5, al sábı shetineýi 3 paıyzǵa tómendedi

ASTANA. QazAqparat - Sońǵy 5 jylda Qazaqstanda ana ólimi 5, al sábı shetineýi 3 paıyzǵa tómendedi. Bul týraly búgin QR Prezıdenti janyndaǵy Áıelder isi jáne otbasylyq-demografııalyq saıasat jónindegi ulttyq komıssııanyń otyrysy aıasynda BAQ ókilderine suhbat bergen elimizdiń Memlekettik hatshysy Gúlshara Ábdiqalyqova málim etti.

«Sońǵy 5 jyldy alatyn bolsaq, onda ana men bala ólimi biraz azaıdy. Máselen, bala shetineýi 3 ese, ana ólimi 5 ese azaıdy. Degenmen, biz aldyńǵy qatarly elderdiń shebine qosylamyz desek, ana men bala ólimi kórsetkishin áli de bolsa tómendetýmiz kerek», - dedi Memlekettik hatshy.

Onyń aıtýynsha, qazirgi ýaqytta ana men bala ólimin tómendetýge baǵyttalǵan naqty sharalar «Salamatty Qazaqstan» baǵdarlamasy aıasynda júrgizilýde. Alaıda, bul baǵdarlama kelesi jyly aıaqtalatyn bolady.

«Úkimet jańa baǵdarlama daıyndaıdy. Biz óz usynystarymyzdy sol jańa baǵdarlamaǵa beretin bolamyz»,- dedi G.Ábdiqalyqova.