Sońǵy 3 jylda «Bolashaq» baǵdarlamasyn bitirgen memlekettik qyzmetshiler sany 39 paıyzǵa ósti

ASTANA. QazAqparat - Sońǵy 3 jylda «Bolashaq» baǵdarlamasyn bitirgen memlekettik qyzmetshiler sany 39 paıyzǵa ósti. Bul týraly búgin halyqpen eseptik kezdesý ótkizgen QR Memlekettik qyzmet isteri mınıstri Talǵat Donaqov málim etti.

«Sońǵy úsh jylda «Bolashaq» baǵdarlamasyn bitirgen memlekettik qyzmetshiler sanynyń 39 paıyzǵa artqany qýantady. Jańa zańǵa sáıkes  jyl basynan beri memlekettik qyzmetke qabyldaý tek qana baıqaý negizinde eń tómengi laýazymnan bastaldy», - dedi ol.

Mınıstrdiń aıtýynsha, osy kezden bastap kandıdattyń mansap jolynda ósýi onyń iskerligi men kásibıligine baılanysty oryn alady.

«Іrikteýdiń úsh satyly júıesi engizildi. Bastapqy eki saty Memlekettik qyzmet isteri mınıstrligi júıesinde júzege asyrylady. Olar: zańnamany bilýine testen ótý, jeke qasıetin baǵalaý. Úshinshi satyda suhbattasý júrgiziledi. Ony kandıdattar memlekettik qyzmetke kirisetin memlekettik organda ótkizedi», - dedi T.Donaqov.