Sońǵy 2 jylda Qazaqstannyń óńdelgen taýarlar eksporty rekordtyq kórsetkishke jetti - Á. Isekeshev

ASTANA. 4 maýsym. QazAqparat - Búgingi tańda shıkizattyq emes eksport boıynsha Qazaqstan táýelsizdik jyldaryndaǵy rekordtyq kórsetkishke qol jetkizip otyr.

2011 jyly 22 mlrd dollar kóleminde óńdelgen taýarlar eksporty júzege asty. Osylaısha sońǵy 2 jyl ishinde óńdelgen taýarlar eksporty 85 paıyzǵa ósti.   Bul týraly búgin Májiliste «2010-2014 jyldarǵa arnalǵan Údemeli ındýstrııalyq-ınnovatsııalyq damý baǵdarlamasyn iske asyrý barysy» taqyrybynda ótken Úkimet saǵaty kezinde Indýstrııa jáne jańa tehnologııalar mınıstri Áset Isekeshev málim etti.

«Óńdelgen taýarlar eksporty negizinen 121 elge joldanyp, elder sany 15-ke ulǵaıdy. Biz dástúrli túrde jolǵa qoıylyp kelgen tyńaıtqysh, bolat ónimderiniń eksportynan basqa, jańa baǵyttardy da baǵyndyrdyq. Máselen, akkýmýlıator eksporty 2,4 esege artyp 47 mln. dollardy qurady», - deıdi mınıstr.

Onyń aıtýynsha, podshıpnıkter eksporty 1,6 esege, mystan jasalǵan symdar eksporty 1,4 esege, al sary fosfor eksporty 1,4 esege ósken. Tájikstan men Qyrǵyzstanǵa tsement eksporty 17 paıyzǵa artyp, 19 mln. dollarǵa jetti.