Sońǵy 18 jylda 1438 ınvestıtsııalyq kelisimshartqa qol qoıylǵan - Úkimet

ASTANA. QazAqparat - QR Premer-Mınıstri Álıhan Smaıylov Investıtsııalyq shtabtyń otyrysyn ótkizdi, onyń barysynda ınvestıtsııalyq kelisimsharttar boıynsha memlekettik zattyq granttar túrinde jer telimderin berý máseleleri qaraldy, dep habarlaıdy QazAqparat.

Syrtqy ister mınıstriniń orynbasary Almas Aıdarovtyń baıandaýynsha, Memlekettik zattyq granttar Qyzmettiń basym túrleriniń tizbesi boıynsha taýarlardy óndirý salasynda da, qyzmet kórsetý salasynda da beriledi jáne saýda-sattyq (aýktsıondardy) júrgizýdi talap etpeıtin erekshe jaǵdaılarǵa jatady.

Zattyq granttardy ákimdikter Aýyl sharýashylyǵy mınıstrliginiń Jer resýrstaryn basqarý komıtetimen kelise otyryp bóledi.

2005 jyldan bastap 2023 jyldyń maýsymyna deıin QR Syrtqy ister mınıstrliginiń Investıtsııa komıteti 1438 ınvestıtsııalyq kelisimshartqa qol qoıdy, onyń 216-sy boıynsha zattyq granttar túrinde jer berilgen jáne 37 myńnan astam jumys orny qurylǵan.

Osy kelisimsharttar sheńberinde 2,2 trln teńge somasyna ınvestıtsııalar tartyldy, onyń ishinde qyzmet kórsetý salasynda (qoıma oryndary, bilim berý, densaýlyq saqtaý, qonaq úı qyzmetteri, jolaýshylar tasymaly salasyndaǵy nysandardyń qurylysy) 125 kelisimshart jasaldy.

Premer-Mınıstr otyrysty qorytyndylaı otyryp, Memleket basshysy Qasym-Jomart Toqaevtyń ınvestıtsııa tartý men bıznesti qoldaýǵa erekshe kóńil bólip otyrǵanyn atap ótti. Úkimet te osy baǵyttar boıynsha belsendi jumys júrgizip keledi.

Osyǵan oraı, Álıhan Smaıylov jaýapty memlekettik organdarǵa zattyq granttar túrinde jer telimderin berýdegi quqyq qoldaný tájirıbesin jetildirý maqsatynda normatıvtik quqyqtyq aktilerdi ózektendirýdi tapsyrdy.