Sońǵy 17 jylda Germanııadan Qazaqstanǵa salynǵan ınvestıtsııa 5 mlrd eýrodan asqan

ASTANA. QazAqparat - Germanııaǵa sapary barysynda Qazaqstan Respýblıkasy Premer-Mınıstriniń orynbasary - Syrtqy ister mınıstri Muhtar Tileýberdi eldiń qarjy astanasy Maındaǵy Frankfýrt qalasyna baryp, nemis qarjy jáne bank toptarynyń basshylarymen birqatar kezdesýler ótkizdi.

Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

«Deutsche Börse» qarjy-bırjalyq kompanııalar tobynyń Basqarma tóraǵasy Teodor Vaımermen «Astana» Halyqaralyq qarjy ortalyǵynyń basqarýshysy Qaırat Kelimbetovpen birlesip ótkizgen kelissózder barysynda taraptar eki el arasyndaǵy bank-qarjy jáne bırja salasyndaǵy yntymaqtastyqty odan ári damytý máselelerin talqylady.

Atalǵan kompanııalar tobyna Frankfýrt qor bırjasy jáne «Eurex» bırjasy, sondaı-aq jeke, korporatıvtik jáne ınstıtýtsıonaldyq ınvestorlarǵa qyzmet kórsetetin enshiles kompanııalar, onyń ishinde qor naryǵynyń jaı-kúıi men damý perspektıvalary, qor naryǵynyń ındeksteri jáne t.b. boıynsha derekterdi taldaý kiredi.

Qazaqstandyq delegatsııa nemis qarjy jáne bank toptarynyń basshylarymen kezdesý ótkizdi, olardyń ishinde KfW, Deutsche Bank AG, Bundesbank, Allianz, Bafin, Euler Hermes, Ernst&Young GmbH, Rothschild, Lakestar, LBBW, Rantum Capital, Mangold Consulting, Frankfurt Main Finance, World Alliance of International Financial Centers (WAIFC) AISBL sııaqty mekemeler men qarjy ınstıtýttarynyń basshylary qatysty.

Nemis aýdıtorııasyna Qazaqstannyń ınvestıtsııalyq múmkindikteri men AHQO áleýeti týraly aqparat usynyldy.

Mınıstr M.Tileýberdi óz sózinde Germanııa Qazaqstannyń Eýropadaǵy negizgi ekonomıkalyq seriktesi jáne bizdiń ekonomıkamyzdaǵy mańyzdy ınvestorlardyń biri ekenin atap ótti.

«Sońǵy 17 jylda Germanııadan Qazaqstanǵa salynǵan ınvestıtsııa 5 mlrd eýrodan asty. Biz óz ındýstrııamyzdy damytýdaǵy nemis bıznesiniń rólin joǵary baǵalaımyz jáne senimdi seriktes retinde odan ári yntymaqtastyq úshin barlyq qajetti jaǵdaılardy jasaýdy jalǵastyramyz», - dedi QR SІM basshysy.

Nemis kásipkerleri elimizdiń ekonomıkalyq áleýetine, júrgizilip jatqan saıası jáne áleýmettik-ekonomıkalyq reformalarǵa shynaıy qyzyǵýshylyq tanytyp, Ortalyq Azııa óńiriniń damýyna belsendi qyzyǵýshylyq bildirdi.

Sońynda QR SІM basshysy M.Tileýberdi Viessmann kompanııasynyń vıtse-prezıdenti Artýr Ýlrıhpen kezdesti, ol jylytý, ónerkásiptik jáne tońazytqysh júıelerin óndirýde álemdik kóshbasshy bolyp tabylady. Kompanııa Qazaqstanda 15 jyl boıy belsendi qyzmet atqaryp keledi. Joǵary tehnologııalyq jabdyq respýblıkadaǵy mańyzdy turǵyn úı, kommýnaldyq jáne ónerkásiptik obektilerdi jabdyqtaý úshin paıdalanylady.