Sońǵy 10 jylda elimizdiń jekelegen óńirleriniń halqy edáýir azaıǵan - N. Sabılıanov

ASTANA. QazAqparat - Sońǵy 10 jylda elimizdiń jekelegen óńirleriniń halqy edáýir azaıǵan. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty, «Nur Otan» partııasy parlamenttik fraktsııasynyń múshesi Nurtaı Sabılıanov málim etti.

Onyń aıtýynsha, 5-saılanymdaǵy QR Parlamentiniń 4-sessııasynyń ashylýynda Memleket basshysy depýtattar aldyna birqatar mańyzdy tapsyrmalar qoıdy. Sonyń biri halyqtyń kóshi-qon máseleleri týraly zań jobasyn basymdyqty túrde qabyldaý jáne Úkimetke osy zańdy aǵymdaǵy jyldyń sońyna deıin Parlamenttiń qaraýyna engizýdi tapsyrdy.

«Qazaqstan halqynyń jalpy sanynyń ósýine qaramastan, jekelegen óńirlerde turǵyndardyń sany azaıǵan. Máselen, sońǵy 10 jylda Soltústik Qazaqstan oblysynyń turǵyndary - 100 myń adamǵa, Shyǵys Qazaqstan oblysynyń turǵyndary - 60 myń adamǵa, Qostanaı oblysynyń turǵyndary - 35 myń adamǵa, Aqmola oblysynyń turǵyndary - 15 myń adamǵa azaıǵan eken. Turǵyndardyń birkelki emes kóship-qonýy jáne Qazaqstannyń jekelegen óńirlerinde ekonomıkalyq turǵydan belsendi azamattardyń orny tolmaýy máselesi jumys kúshiniń tapshylyǵy, mektepterdiń jabylýy jáne de sonyń saldarynan eldi mekenderdiń joıylýyna alyp kelýde», -dep atap ótti depýtat.

Onyń aıtýynsha, bir ǵana Shyǵys Qazaqstan oblysynda sońǵy 5 jylda 70-ten astam mektep jabylǵan. «Bul - 70-ke jýyq eldi meken joıylýy múmkin degen sóz», - deıdi halyq qalaýlysy.

Mundaı máseleniń aldyn alý joldaryn aıta kele, halyq qalaýlysy oralmandar máselesin qolǵa alý kerektigin alǵa tartty.

«Osyǵan baılanysty, memleket turaqty túrde turýǵa kelgen jáne memlekettik organdar belgilegen naqty óńirlerge jiberilgen oralmandarǵa qoldaý kórsetýge tıis. ıAǵnı olardyń azamattyq alýyna jaǵdaı jasaý, úımen qamtý jáne de olardy osy qoǵamnyń azamattary retinde qoldaý kórsetý. Jumysqa turýyna, kásipkerlikpen aınalysýyna jaǵdaı jasalýy kerek dep oılaımyn», - dedi N. Sabılıanov.