Sońǵy 10 jyl ishinde UQK terrorlyq sıpattaǵy 100 shaqty aktsııanyń aldyn aldy - Másimov

ASTANA. QazAqparat - Sońǵy 10 jyl ishinde UQK terrorlyq sıpattaǵy 100 shaqty zorlyq-zombylyq aktsııasynyń aldyn aldy. «Egemen Qazaqstan» gazetindegi maqalasynda Qazaqstan Respýblıkasy UQK tóraǵasy Kárim Másimov osylaı jazdy, dep habarlaıdy QazAqparat.

«15 jyl buryn Memleket basshysy UQK-ge kelip, onda arnaıy qyzmet jumysy qalaı qurylýy kerektigi týraly óziniń kózqarasy men basymdyqtaryn belgilep berdi», dep jazady QR Ulttyq qaýipsizdik komıtetiniń tóraǵasy.

Tóraǵanyń aıtýynsha, Memleket basshy­synyń strategııasyna saı UQK, ózge de memlekettik organ­darmen birge, ishki saıası turaq­tylyqty, ultaralyq jáne kon­fes­sııaaralyq kelisimdi saqtaýdy qam­tamasyz etip otyr. «Búginde Qazaqstan men UQK or­gandary alǵash ret halyqaralyq terrorızm jáne dinı ekstremızm sekildi qubylystarmen betpe-bet keldi. Biz atalǵan toptarmen kúreste joldastarymyzdyń ómir­lerin qurban etip, asa aýyr sabaq aldyq.

Sol joly Pre­zı­dent naqty tapsyrma - qazaq­standyqtardy osy qaýip-qater­lerden qorǵaý týraly mindet qoıdy. Qysqa merzim ishinde UQK organdary durys qory­tyndylar jasap, jaǵdaıdy baqylaýlaryna aldy. Elimizde terrorlyq ınfraqurylymdar qurý áreketi júzege asyrylmaı tastalsa, birqatar lańkestikterge daıyndyqtyń joly kesildi. Sońǵy 10 jyl ishinde ǵana UQK-niń terrorızmge qarsy qyzmeti terrorlyq sıpattaǵy 100 shaqty zorlyq-zombylyq aktsııasynyń aldyn aldy. Halyqaralyq terrorlyq uıymdardyń Qazaqstanǵa qaraı umtylystary joqqa shyǵaryldy. Kúrdeliligi jaǵynan biregeı operatsııalar júzege asyrylyp, «Ortalyq Azııa modjahetteriniń ja­maaty», «Djýnd-ál-Halıfat», «Hızb-ýt-Tahrır» jáne basqa da qury­lymdar joıyp jiberildi. Árip­tes arnaıy qyzmettermen birge onda­ǵan terrorshylar men ekstremıster izdep tabylyp, ekstradıtsııalandy», - dep jazdy Kárim Másimov.

Osy operatsııalarǵa 160-tan astam antı­terrorlyq jáne jedel-áskerı sharalar ótkizgen arnaıy maq­sattaǵy «A» qyzmetiniń qyzmet­kerleri úlken úles qosqan. «Olardyń kópshiligi batyldyq pen batyrlyqtyń eren úlgisin kórsetkenderi úshin memlekettik nagradalarǵa ıe bolsa, ókinishke qaraı, keıbireýleri opat boldy. Qazir arnaıy maqsattaǵy «A» qyzmeti eń zamanaýı qarý-jaraq, ekıpırovka jáne tehnıka úlgilerimen jaraqtanǵan joǵary kásibı bólimshe bolyp tabylady. Onyń jaýyngerleri - arnaıy qyzmettiń súzgisinen ótken betke ustarlary deýimiz kerek. Olar kún demeı, tún demeı asa kúrdeli áskerı mindetterdi sheshýge qabiletti. Muny 2016 jyldyń jeltoqsan aıynda atalǵan qyzmette bolǵan kezinde Memleket basshysynyń ózi erekshe atap kórsetti. Sol joly Elbasy «A» qyzmetiniń jeke quramymen áńgime-dúken quryp, bólimsheniń materıaldyq-tehnıkalyq bazasymen tanysqan bolatyn», - delingen maqalada. 

Prezıdenttiń ókimimen 20 jyl buryn terrorızm qateriniń óse túsip otyrǵany eskerile kelip, Qazaq­stan Respýblıkasynyń vedomstvo­aralyq Antıterrorlyq ortalyǵy (ATO) quryldy.