Sońǵy úsh táýlikte elimizde qansha munaı men gaz óndirildi

<p>Sońǵy úsh táýlikte elimizdiń munaı-gaz ónerkásibinde kómirsýtekti shıkizat óndirý, ony óńdeý kórsetkishi qubyldy. Al, munaı óńdeý kólemi úsh táýlik qatarynan azaıdy, dep habarlaıdy Kazinform.</p>

Qazaqstan Respýblıkasynyń otyn-energetıkalyq ahýaldyq-taldamalyq ortalyǵynyń Telegram arnasynda elimizdegi kompanııalardyń munaı men gaz óndirý, «qara altyn» óńdeý kórsetkishi týraly málimet jarııalandy.

Máselen, 28 jeltoqsanda Qazaqstandaǵy tabıǵat paıdalanýshy kompanııalar 254,4 myń tonna munaı men gaz kondensatyn óndirgen. Bul kórsetkish 29 jeltoqsanda 258,7 myń tonnany qurady. Demek, bir táýlikte 4,3 myń tonnaǵa artyp otyr.

Alaıda, keshe, 30 jeltoqsanda munaı men gaz kondensatyn óndirý kórsetkishi tómendedi. Bul táýlikte 257,6 myń tonnany quraǵan kómirsýtekti shıkizat óndirildi.

Sońǵy úsh táýlikte ilespe gaz óndirý kórsetkishi de qubyldy. Máselen, 28 jeltoqsanda kompanııalar 179,2 mln tekshe metr gaz óndirgen. Bir táýlikten soń, 29 jeltoqsanda gaz óndirý kólemi azaıyp, 178,7 mln tekshe metrdi quraǵan. Al, 30 jeltoqsanda ilespe gaz óndirý kórsetkishi qaıta artyp, 179,4 mln tekshe metrge jetti.

Jer astynan óndirilgen tabıǵı baılyqty óńdeý kórsetkishiniń úsh táýlik boıy tómendegeni baıqalyp otyr. Óıtkeni, 28 jeltoqsanda elimizdegi munaı óńdeý zaýyttarynda 49,3 myń tonna «qara altyn» óńdelgen.

Burnaǵy kúni – 29 jeltoqsanda zaýyttarda óńdelgen kómirsýtekti shıkizat kólemi 49,2 myń tonnany qurady. Ótken táýlikte ónim óńdeý kórsetkishi taǵy tómendedi. Naqtylaı aıtqanda, keshe, 30 jeltoqsanda 48,9 myń tonna munaı óńdeldi.

Eske sala ketelik, budan buryn «Teńiz-Novorossıısk» qubyrymen munaı tasymaldaý úsh kúnge nege toqtatylǵanyn jazǵan edik.