Sońǵy sáttegi daǵdarys: Izraıl HAMAS-pen jasalǵan kelisim boıynsha daýys berýdi keıinge qaldyrdy
Izraıl premer-mınıstri Bınıamın Netanıahý keńsesi úkimettiń atysty toqtatý týraly kelisim boıynsha daýys berýin keıinge qaldyrǵanyn málimdedi. Habarlamada HAMAS keıbir kelisimderden bas tartqany jáne kepilge alynǵandardy bosatý týraly mámileni aıaqtaýda «sońǵy sátte daǵdarys» týdyrǵany aıtylǵan.
— HAMAS ýaǵdalastyqty buzyp, sońǵy sátte daǵdarys týdyryp, kelisimge qol jetkizýge kedergi keltirip otyr. Izraıl úkimeti HAMAS kelisimniń barlyq elementterin qabyldaǵany týraly deldaldardan habar almaıynsh jınalys ótkizbeıdi, — delingen aǵylshyn jáne ıvrıt tilderinde jarııalanǵan premer-mınıstr málimdemesinde.
HAMAS joqqa shyǵardy
HAMAS qozǵalysynyń joǵary laýazymdy ókili Izzat ál-Rıshek palestınalyq toptyń atysty toqtatý jáne kepilge alynǵandardy bosatý týraly kelisimniń keıbir bólikterinen bas tartty degen aıyptaýlardy joqqa shyǵaryp, onyń deldaldar keshe jarııalaǵan kelisimge adal ekenin málimdedi.
— Netanıahý qozǵalystyń atysty toqtatý kelisiminiń sharttarynan bas tartyp jatqany týraly málimdemeleri esh negizsiz, — dedi HAMAS-tyń resmı ókili Samı Abý Zýhrı.
Gaza sektory áli de oq astynda
Netanıahý keńsesiniń málimdemesinen keıin Izraıl áskeri Gaza sektoryna shabýyldaryn kúsheıtti. Sonyń saldarynan sońǵy 24 saǵatta keminde 81 palestınalyq qaza tapty, dep habarlaıdy anklavtyń Densaýlyq saqtaý mınıstrligi.
Al Jazeera agenttiginiń habarlaýynsha, Gaza sektorynyń soltústigindegi Djabalııa qalasyna Izraıldiń shabýylynan keminde 20 adam qaza tapqan. Gaza sektorynyń Densaýlyq saqtaý mınıstrliginiń málimetinshe, atysty toqtatý týraly kelisim jarııalanǵannan beri Izraıl shabýyldary saldarynan keminde 72 adam qaza tapqan.
Eske sala keteıik, keshe atysty toqtatý rejımi 19 qańtar, jeksenbi kúni kúshine enedi dep jarııalanǵan bolatyn.
Atysty toqtatý rejıminiń kúshine enýine áli 72 saǵat qalǵanda, turǵyndar aldaǵy saǵattarda qıraý men shyǵyn kóleminiń artýynan qaýiptenýde.
Másele nede ?
Qatar men AQSh bul kelisimge kelý protsesinde deldal retinde qatysyp, keshe keshke ýaǵdalastyqqa qol jetkizilgenin habarlaǵan bolatyn. Alaıda Izraıl kelisimniń áli de sheshilmegen tustary bar ekenin atap ótýde. Negizgi kelispeýshilikter palestınalyq tutqyndardy bosatý máselesine qatysty týyndaǵan.
Izraıl premer-mınıstri HAMAS-ty «bul qylmyskerlerdiń arasynan kim bosatylatynyn dıktatýramen anyqtaýǵa tyrysýda» dep aıyptap, bul aldyn ala kelisilgen sharttarǵa qaıshy keletinin aıtýda. Kelisim mátininde tutqyndardy bosatý «eki taraptyń maquldaǵan tizimderi negizinde» júrgizilýi tıis dep kórsetilgen.
The Times of Israel basylymynyń habarlaýynsha, Izraıldiń kelissózder toby áli de Doha qalasynda, atysty toqtatý jáne kepilge alynǵandardy bosatý týraly kelisimniń egjeı-tegjeılerin aıaqtap jatyr.
Bınıamın Netanıahý túpkilikti kelisimge qol qoıylmaǵanyn jáne keıbir málimetterdiń áli naqtylanbaǵanyn aıtyp, bul kelisim týraly áli resmı túrde jarııalamady. Premer-mınıstr kelisim tolyq aıaqtalǵannan keıin ǵana halyqqa úndeý jasaıtynyn málimdedi.
Koalıtsııaǵa jik tústi me ?
HAMAS-qa taǵylǵan aıyptarǵa qaramastan, keıbir ızraıldik BAQ daýys berýdiń keıinge qaldyrylýyn qarjy mınıstri, ýltraońshyl «Dinı sıonızm» partııasynyń jetekshisi Betsalel Smotrıchti úkimetten shyqpaýǵa kóndirýge baǵyttalǵan sońǵy árekettermen baılanystyrady.
Izraıldiń Kan qoǵamdyq habar taratý qyzmeti habarlaǵandaı, beısenbi kúni saǵat 11:00-de ótedi dep josparlanǵan úkimet otyrysy beısenbi tańynda «Dinı sıonızm» partııasy ishindegi talqylaýlarǵa baılanysty keıinge qaldyrylǵan. Partııa músheleriniń úkimet koalıtsııasyndaǵy bolashaǵy týraly sheshim qabyldaý úshin jınalatyny týraly habarlandy.
Sondaı-aq, premer-mınıstr Bınıamın Netanıahý Smotrıch óz partııasynyń bul kelisimge qarsy narazylyq belgisi retinde otstavkaǵa ketetini nemese ketpeıtini týraly naqty jaýap bermeıinshe, úkimet otyrysyn shaqyrmaıtyny aıtyldy.
Ońshyl partııanyń jetekshisi Betsalel Smotrıch sársenbi kúni keshke bul kelisimdi «jaman ári qaýipti» dep aıyptap, narazylyq retinde partııanyń úkimetten shyǵýy múmkin ekenin málimdegen.
Osyǵan deıin Izraıl men HAMAS arasyndaǵy kelisimge ne kedergi bolyp otyrǵany týraly jazǵan edik.