Sońǵy bes jylda elimizdegi venchýrlyq kapıtal kólemi alty eseden astam ósip, $80 mln-ǵa jetti

<p>ASTANA. KAZINFORM - Premer-mınıstr Oljas Bektenov venchýrlyq qarjylandyrý salasyndaǵy jetekshi sarapshylar, qazaqstandyq bıznes-qoǵamdastyq ókilderi jáne halyqaralyq áriptestermen kezdesý ótkizdi, dep habarlaıdy Úkimettiń baspasóz qyzmeti.</p>

Talqylaýdyń basty taqyryby jahandyq kapıtaldy tartýǵa, startap-ekojúıeni damytýǵa jáne Qazaqstannyń óńirlik tehnologııalar men ınnovatsııalar ortalyǵy retindegi ustanymyn nyǵaıtýǵa baǵyttalǵan Venchýrlyq ınvestıtsııalar qorlary qoryn qurý boldy.

Dıalogqa shaqyrylǵan Stenford ýnıversıtetiniń professory jáne venchýrlyq ınvestıtsııa boıynsha tanymal sarapshy Ilıa Strebýlaev, Andreessen Horowitz seriktesi Malıka Aýbakırova jáne Lightspeed Venture Partners seriktesi Ǵalym Imanbaev, sondaı-aq DCVC ınvestıtsııalar jónindegi dırektory Anna Fokına ınnovatsııalardy damytýdaǵy óz tájirıbelerimen bólisti. Sarapshylar Qazaqstanǵa eleýli progreske qol jetkizý úshin álemdik jetekshi venchýrlyq ınvestıtsııalar qorlarymen yntymaqtastyqty nyǵaıtý mańyzdy ekenin atap ótti, bul ınvestıtsııalardy basqarýdyń ozyq tehnologııalary men ozyq tájirıbelerine qol jetkizýdi qamtamasyz etýge múmkindik beredi. Olar jahandyq kapıtaldy tartý úshin quqyqtyq ınfraqurylymdy nyǵaıtyp, startaptardy damytýdyń keıingi kezeńderinde qoldaýǵa jaǵdaı jasaý qajettigin atap ótti.

Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstan óńirdiń barlyq venchýrlyq mámileleriniń 70%-dan astamyn qamtamasyz etip, Ortalyq Azııada kóshbasshylyq ustanymdy ıelenip otyrǵanyn atap ótti. Sońǵy bes jylda elimizdegi venchýrlyq kapıtal kólemi alty eseden astam ósip, $80 mln-ǵa jetti.

Qordyń qurylýy Qazaqstannyń ınvestıtsııalar men tehnologııalardyń halyqaralyq ekojúıesine ıntegratsııalanýyna baǵyttalǵan eldiń venchýrlyq kapıtal naryǵyn damytýdyń jańa kezeńin bildiredi.

Venchýrlyq ınvestıtsııalar qorlary qory orta merzimdi perspektıvada jetekshi álemdik, óńirlik jáne qazaqstandyq venchýrlyq qorlarǵa baǵyttalatyn $1 mlrd jeke ınvestıtsııalardy tartýǵa baǵyttalǵan. Bul tıimdi ártaraptandyrýdy, ekonomıkany transformatsııalaý úshin qajetti jahandyq quzyretter men asa mańyzdy tehnologııalarǵa barynsha qol jetkizýdi qamtamasyz etýge múmkindik beredi. Búgingi tańda qordyń bastapqy kapıtalyn qalyptastyrýǵa qazaqstandyq iri bıznes ókilderinen $100 mln-nan astam somaǵa ótinimder jınaldy.

Qor jumysynda jasandy ıntellekt, tsıfrlyq densaýlyq saqtaý jáne basqa da negizgi tehnologııalyq salalardy qosqanda, perspektıvaly baǵyttarǵa erekshe nazar aýdarylatyn bolady. 2030 jylǵa qaraı álemdik jasandy ıntellekt naryǵy $827 mlrd-qa deıin ósedi dep boljanýda, bul salany ınvestıtsııalar úshin basym baǵyttardyń birine aınaldyrady.

Premer-mınıstr Oljas Bektenov Venchýrlyq ınvestıtsııalar qorlary qoryn qurý ozyq tehnologııalarǵa qoljetimdilikti ashyp qana qoımaı, Qazaqstannyń halyqaralyq startaptar men tehnologııalar haby retindegi ustanymyn nyǵaıtady dep atap ótti.

«Prezıdent Qasym-Jomart Toqaev atap ótkendeı, biz bilim men ınnovatsııaǵa negizdelgen ekonomıka quryp jatyrmyz. Búginde Qazaqstanda IT sektory belsendi damyp keledi, tsıfrlyq qyzmetter eksporty artyp, jas mamandar el ishinde de, shetelde de suranysqa ıe bolyp otyr. Bizdiń basty mindetimiz – ózimizdiń talanttarymyzdy saqtap qalýǵa jáne jańa daryndardy tartýǵa jaǵdaı jasaý, startaptardy damytýdyń barlyq kezeńinde qoldaý jáne Qazaqstanǵa jahandyq quzyretterdi tartý», — dep atap ótti Oljas Bektenov.

Osyǵan deıin Úkimet basshysy gaz ben munaı óndirýdi arttyrýdy tapsyrǵany týraly jazdyq.