«Son PASKALЬ: «Qazaq tilin menen de nashar biletin adamdar bar» - respýblıkalyq basylymdarǵa sholý
***
«Egemen Qazaqstan» basylymy búgingi sanynda Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasynyń bastyǵy, tehnıka ǵylymdarynyń doktory Edil Jańbyrshınnen alǵan suhbatty «Sý suraǵan Mańǵystaý» atty taqyryppen berip otyr. Bul óńirdegi aýyz sý máselesin qalaı sheshýge bolady? Shegi kók aspanmen astasyp, túbi tuńǵıyqqa tartatyn telegeı teńiz jaǵasyndaǵy óńir sýǵa muqtaj. Átteń deısiń keıde, tuşy sý kózderi mol bolǵanda Mańǵystaýda jasyl quraq jaıqala ósip, ár úıdiń aýlasynda tal-terek syńsyp, árkim óz baqshasynan bal tatar edi-aý dep. Biraq, bul ádemi sýrettiń tek eles kúıinde eske túsetin qııal ekendigin moıyndaǵan sátte, tabıǵat-anany bir qolymen berip, ekinshi qolymen tarta ustaǵan esepti jandaı sezinetiniń de bar. Óıtkeni, jeriniń asty jabýly sandyqtaı qazynaǵa toly Mańǵystaýda tuşy sýǵa, ásirese aýyz sýǵa zárýlik kún ótken saıyn arta túsýde. Osy suhbatta tyǵyryqtan shyǵý joldary bar ma, ol baǵytta qandaı jumystar atqarylýda jáne dál qazirgi tańda óńirdi sýmen qamtý máselesi qalaı jolǵa qoıylǵandyǵy jaıynda baıandalady.
«Túp tegi brıtandyq bolyp tabylatyn Italııa ánshisi, sazger ári saıahatshy Son Paskaldyń Qazaqstanda júrgenine jarty jyl boldy. Qazir elimizde bul jigitti bilmeıtin jastar az. Ol ózimizdiń tanymal akterlardyń biri Ánýar Nurpeıisovpen birigip túsirgen «Englishman in Shimkent», «Chaıka Aıgýl» ıýmorlyq klıpteri arqyly tanymal bolyp shyǵa keldi. Bastapqydaǵy álemdik charttarda bul klıpter eń kóp qaralǵan ánderdiń qatarynda bolǵan. Sonnyń «Abaıdyń «Kózimniń qarasyn» da azdap óz maqamyna salyp shyrqaǵan romantıkalyq klıpi de kóńilden shyqty. Qysqasy, ǵalamtor arqyly mýzyka tyńdaǵandy jaqsy kóretin jastar arasynda bul ánder áli de reıtıngin joǵaltqan joq»,-dep jazady «Egemen Qazaqstan» búgingi sanynda. Osy ánshi jaıynda tolyq bilgińiz kelse kelse, «Son PASKALЬ: «Qazaq tilin menen de nashar biletin adamdar bar» atty maqalany oqyǵanyńyz jón.
***
«Aıqyn» basylymynyń jazýynsha, Kaspııdiń quqyqtyq mártebesin anyqtaý máselesi taǵy da kóterile bastady. Ras, táýelsizdikke qol jetkizilgeli beri teńiz boıynda jatqan bes memleket áli kúnge Kaspıı jóninde bir mámilege kele alǵan joq. Talaı ret resmı kezdesý boldy, biraq túrli sebeptermen teńiz mártebesin sheshý keıinge syrǵı berdi. Sebebi, álemde óte iri munaı men gaz qory bar (Soltústik teńiz ben Rapsy Shyǵanaǵynan keıingi) bul aımaqtyń baılyǵyn jaǵalaýda jatqan bes elge tepe-teń etip bólý - ońaı sharýa emes. Osy ózekti másele jaıynda jazylǵan maqala «Kaspııge kóz tikkender kóp» atty taqyryppen jarııalandy.
***
«Eýropalyq odaqtyń daǵdarysy ýshyǵyp jatqan kezde álemniń mańyzdy ortalyqtary Azııaǵa aýysýy múmkin degen tórt-bes jyl burynǵy batyl boljamdar rasqa aınala bastaǵandaı. Sebebi sarapshylar alǵashqy jahandyq daǵdarystyń oshaǵy AQSh bolsa, ekinshi tolqynnyń bastaýy Eýroodaq tyǵyryǵy men eýro daǵdarysy bolǵaly otyr»,-dep jazady «Alash aınasy» gazeti búgingi sanynda. Daǵdarystyń túpki sebebin bir polıýsti álemniń kesirinen dep biletin Eýroparlamenttiń burynǵy depýtaty Djýletto Kezanyń pikirinshe, álemdegi mańyzdy qarjylyq ortalyqtar Azııa qurlyǵyna qaraı oıysa bastaǵan. Ekonomıkalyq daǵdarys máselesi turǵysyndaǵy bul maqala «Álem kindigi Azııaǵa aýysa ma?» degen taqyryppen basyldy.
***
Sheteldik kýrorttar búginde qazaqstandyq týrısterdi kóptep qabyldap jatyr. Statıstıkaǵa málimetterine qaraǵanda, el azamattarynyń saıahat jasaýǵa degen qushtarlyǵynyń artqany baıqalýda, dep jazady «Ekspress-K» basylymy «Aral ne predlagat» atty materıalynda. Respýblıkanyń 134 889 turǵyny ózge memleketterdi aralaǵan kórinedi. Bir jyl buryn bul kórsetkish 128 335 bolsa, al 2010 jyly 113 945 qazaqstandyq álem elderinde bolyp qaıtqan.