Soltústiktegi dıqandar eginderin keptire almaı dabyl qaǵyp otyr

<p>PETROPAVL. KAZINFORM &ndash;<strong>&nbsp;</strong>Soltústiktegi dıqandar oryp alǵan eginderin keptire almaı otyr. Sebebi ony qabyldaıtyn elevatorlarda oryn joq. Sharýalar sary altyndy der kezinde keptirmese, kógerip búlinip ketýi múmkin dep dabyl qaǵyp otyr. Bul týraly Jibek Joly arnasynyń jańalyqtarynda aıtyldy.</p>

Bıyl Soltústik Qazaqstan oblysynda egin bitik shyqty. Aýa-raıynyń qolaısyzdyǵyna qaramastan óńir dıqandary 6 mıllıon tonnadan astam bıdaı jınady. Másele qashan retteledi?

Astyq elevatorlarynda oryn joq

Soltústikqazaqstandyq dıqandar úshin kúzgi naýqan ońaıǵa soqpady. Jaz boıy tolassyz jaýǵan jaýyn, rızyǵyn jerden teretin sharýalardy ábigerge saldy. Osyǵan qaramastan óńir sharýalary mol ónim jınady. Endigi másele ony keptirý qajet. Al sharýalar bolsa elevator tappaı dal.

– Jaýyn kóp boldy. Bıdaı bitik shyqty, biraq onyń ylǵaldylyǵy joǵary. Al elevatorlarda oryn joq. Qazir keı sharýalar jınaǵan ónimderin shaǵyn astyq qabyldaý oryndaryna aparyp jatyr. Al ony keptirmese, erteń búlinedi. Másele sheshilmese erteń jappaı shyǵynǵa batýymyz múmkin, - deıdi sharýa Raıl Mendeev.

Oblysta jalpy syıymdylyǵy 3,2 mıllıon tonna bolatyn 46 elevator jumys istep tur. Budan bólek shaǵyn astyq qabyldaý oryndary taǵy bar. Alaıda dıqandar jınaǵan ónimderin elevatorlarǵa ótkize almaı júr. Sebebi kásiporyndardyń deni tolǵan.

– Elevator qazir bıdaıǵa tolyp tur. Sol sebepti ony qabyldaýǵa múmkindik joq bizde. Bıdaıdyń sapasy 4-shi jáne 5-shi klass. Úshinshi klass óte az. Uzyn-sonar kezekke bola qıynshylyqtar týyndap otyr. Elevator óte baıaý jumys istep jatyr. Óıtkeni jańaǵy ylǵaldy bıdaı kóp kirip jatyr. Soǵan baılanysty jumys isteý ýaqyty jalpy uzartylyp jatyr ǵoı elevatordyń, - deıdi Elevator bastyǵy Nurjan Dáýitov.

Aýyl sharýashylyǵy basqarmasyndaǵy mamandar atalǵan máseleden habardar. Jáne ol jaqyn kúnderi turaqtalady dep otyr.

– Qazir fermerlerdiń kóbi elevatorlarǵa jappaı astyq ákelip jatyr. Al daqyldardy tolyq tekserip alý úshin ýaqyt qajet. Sondyqtan birer kúnde jaǵdaı durystalady. Jalpy oraq naýqanyn sapaly aıaqtaý úshin arnaıy shtab qurylǵan. Búginge kúnge deıin óńirdegi elevatorlar jańa astyqtyń 1,5 mıllıon tonnasyn qabyldap úlgerdi, - dedi Aýyl sharýashylyǵy basqarmasy basshysynyń orynbasary Jalǵas Súleımenov.

Sharýalardyń tókken terimen eseli eńbegi zaıa ketpeıdi. Sala mamandary oǵan jol bermeımiz dep sendirdi.