Soltústik Koreıa birneshe ballıstıkalyq zymyran ushyrdy

<p>ASTANA. Kazinform &ndash; Soltústik Koreıa búgin, 14 qańtarda Japon teńizine qaraı birneshe qysqa qashyqtyqtaǵy ballıstıkalyq zymyrandardy ushyrdy. Bul týraly Ońtústik Koreıanyń Yonhap aqparat agenttigi eldiń qarýly kúshteriniń bas shtabyna silteme jasap habarlady, dep jazady <a href="https://www.dw.com/ru/severnaa-korea-zapustila-neskolko-ballisticeskih-raket-maloj-dalnosti/a-71291574" target="_blank" rel="noopener">DW</a>.</p>

Shtab bastyqtary birikken komıtetiniń (ShBBK) habarlaýynsha, ushyrý Chagando provıntsııasynyń Kange qalasynan jergilikti ýaqyt boıynsha shamamen 9.30-da tirkelgen. Zymyran teńizge qulaǵanǵa deıin 250 shaqyrymdaı ushyp ótken. Ońtústik Koreıa áskerıleri KHDR ushyrǵan zymyrandardyń sanyn naqtylamady.

Seýl ushyrýdy Phenıannyń kezekti arandatýy dep sanaıdy. 

– Qysqa qashyqtyqqa ushatyn ballıstıkalyq zymyrandardyń aýqymyn eskere otyryp, olardyń kózdegen nysany Ońtústik Koreıa bolyp tabylady, – dep atap ótti Yonhap.

ShBBK ushyrýdy Koreı túbegindegi beıbitshilik pen turaqtylyqqa qaýip tóndiretin «ashyq arandatýshylyq» dep atady jáne Phenıan «qate sheshim» qabyldaǵan jaǵdaıda tolyq daıyn bolýǵa ýáde berdi. Ońtústik Koreıa áskerıleri daıyndyq kezinde «baqylaý men qyraǵylyqty arttyryp, Soltústik Koreıanyń zymyrandary týraly aqparatty AQSh jáne Japonııamen bóliskenin» málimdedi.

Aıta keteıik, buǵan deıin Soltústik Koreıa bıyl alǵashqy zymyranyn ushyrǵanyn jazǵan edik.