Soltústik Qazaqstan oblysynda 17 laýazymdy tulǵa jaýapqa tartyldy
SQO prokýratýrasynyń málimetinshe, jyl basynan beri memlekettik satyp alýda qadaǵalaý organynyń aktileri boıynsha 3,3 mlrd teńgeniń 11 zańsyz konkýrsy joıylyp, 17 laýazymdy tulǵa túrli jaýapkershilikke tartyldy. Onyń ishinde altaýy - memlekettik qyzmettiń bedelin túsirgeni úshin, sonyń 3-eýi jumystan bosatylyp, 3-eýi qyzmetke tolyq sáıkes emestigi týraly eskertildi.
Tımırıazev aýdanynyń turǵyn úı-kommýnaldyq sharýashylyq bóliminiń basshysy memlekettik satyp alý jáne memlekettik qyzmet týraly zańnama talaptaryn óreskel buzǵan. Ol oryndalǵan jumys aktilerine qol qoıyp, jetkizýshige taratý jelilerin qaıta qurýdyń jobalyq-smetalyq qujattamasyn ázirlegeni, is júzinde oryndalmaǵan jumys úshin 6,7 mln teńge tólem jasaǵan.
Al, Tımırıazev aýyldyq okrýgi ákiminiń mindetin atqarýshy zań talaptaryna qaıshy, tapsyrysty alýshyǵa balalar sport alańyn salý boıynsha is júzinde oryndalmaǵan jumysqa 19,9 mln teńge tólegen.
Osyndaı zań buzýshylyqtarǵa Aqqaıyń aýdany Astrahan aýyldyq okrýginiń ákimi de jol berip, alań aýmaǵyn tegisteý, josparlaý jáne daıyndaý jumystaryna 1,3 mln teńge tólegen. Al is júzinde onyń biri de oryndalmaǵan.
Qadaǵalaý organynyń aktileri jáne SQO boıynsha Memlekettik qyzmet isteri agenttigi departamentiniń Ádep jónindegi keńesiniń usynysy boıynsha bul laýazymdy tulǵalar qyzmetinen bosatyldy.
Buǵan deıin SQO-da Shaǵalaly ózeniniń sý deńgeıi bir táýlikte 1,5 metrge kóterilgenin aıtqan edik. Al Petropavlda qarǵyn sý úılerge kirip jatyr. Tek bir táýlikte arnaıy qyzmetterge 12 adam habarlasyp, kómek surady.