Soltústik Aralǵa jyl basynan beri shamamen 2 mlrd tekshe metr sý jiberildi - mınıstr
Bul týraly búgin Halyqaralyq Araldy qutqarý Qory Basqarmasynyń otyrysynda Sý resýrstary jáne ırrıgatsııa mınıstri Nurjan Nurjigitov málimdedi.
Aıta keteıik, otyrys Tájikstan, Túrikmenstan, Ózbekstan jáne Qyrǵyzstannan kelgen delegatsııalardyń qatysýymen ótip jatyr.
«Ózderińiz biletindeı, búgingi tańda Prezıdentimiz Halyqaralyq Araldy qutqarý Qorynyń basshysy bolyp saılandy. Qordyń tóraǵasy retinde bizdiń elimizge úlken jaýapkershilik júktelgen jáne biz Ortalyq Azııanyń basqa memleketterimen tyǵyz qarym-qatynasta bolamyz. Birlesip Aral teńizin saqtaý boıynsha eleýli nátıjelerge qol jetkizdik jáne osy baǵyttaǵy jumysty ári qaraı jalǵastyrýǵa nıettimiz. Bıyl Soltústik Aralǵa turaqty túrde sý keledi. Sýarý kezeńiniń ortasynda Syrdarııa ózeni arqyly teńizge sekýndyna 80 tekshe metrge deıin sý jiberildi. Salystyrmaly túrde, bir jyl buryn sekýndyna 6 tekshe metr ǵana barǵan bolatyn. Sońǵy jyldary Soltústik Aralda sý kólemi tómendedi, biraq 2024 jyldyń basynan sý deńgeıi qaıta kóterile bastady jáne búginde 22 mlrd tekshe metrge jetti. Soltústik Aralda sý kóleminiń odan ári ulǵaıýyn qamtamasyz etý úshin biz sý dıplomatııasyn kúsheıtip, Soltústik Aral teńizin qalpyna keltirý jónindegi jobanyń ekinshi kezeńin ázirlep jatyrmyz», – dedi Sý resýrstary jáne ırrıgatsııa mınıstri Nurjan Nurjigitov.
Sonymen qatar, qatysýshylar Qazaqstannyń 2024-2026 jyldary HAQQ tóraǵalyq etý kezeńine arnalǵan Atqarý komıtetiniń jumys josparyn bekitti. Qujat quryltaıshy memleketterdiń basshylary men HAQQ Prezıdentiniń tapsyrmalaryn iske asyrý, Qordyń uıymdyq qurylymy men sharttyq-quqyqtyq bazasyn jetildirý jáne t.b. máseleler boıynsha 10 baǵyttan jáne 40-tan astam is-sharadan turady.
Esterińizge sala keteıik, Astanada Qazaqstannyń tóraǵalyǵymen Halyqaralyq Araldy qutqarý Qory Basqarmasynyń birinshi otyrysy ótti.
Jıynǵa QR Premer-Mınıstri Oljas Bektenov, QR Premer-Mınıstriniń orynbasary Qanat Bozymbaev, HAQQ Atqarý komıtetiniń tóraǵasy Ashat Orazbaı, Tájikstan Respýblıkasy Premer-Mınıstriniń orynbasary Sýlaımon Zıezoda, Túrikmenstan Mınıstrler Kabıneti Tóraǵasynyń orynbasary Tangrykýlı Atahallyev, Ózbekstan Respýblıkasy Prezıdentiniń keńesshisi Shýhrat Ganıev qatysty.
Aıta keteıik, Syrdarııa ózeni aǵynynyń 75%–y Qyrǵyzstanda, 20%–y Ózbekstanda jáne 5%-y Qazaqstanda qalyptasady.