Soltústiktegi 300 aýyl jańarady
Ortalyq kommýnıkatsııalar qyzmetinde ótken baspasóz konferentsııasynda Soltústik Qazaqstan oblysynyń ákimi Qumar Aqsaqalov aldaǵy bes jylda óńir aýyldaryn damytýǵa qomaqty qarajat bólinetinin jetkizdi.
«Ótken jylmen salystyrǵanda oblys qazynasy 25%-ǵa, ıaǵnı 323 mlrd teńgeden 406 mlrd teńgege deıin ósti. Jalpy 5 jyl ishinde bizdiń óńir 500 mlrd teńge kóleminde eleýli mólsherde qoldaýǵa ıe bolady. Ol aqsha túrli salalarǵa jumsalady. Biraq maqsat jalǵyz – soltústikqazaqstandyqtardyń ómir súrý sapasyn arttyrý. Bul ásirese aýyl turǵyndarynyń turmys sapasyna qatysty. Óńirdiń 300 aýylyn jańartýǵa úlken qarajat jumsamaqpyz», - dedi óńir basshysy.
Qumar Aqsaqalovtyń aıtýynsha, bıyldyń ózinde 100-den astam aýylda medıtsınalyq nysandar men joldar, ınjenerlik ınfraqurylym jóndeýden ótpek.
«Bıyl 115 aýyldy jańǵyrtýǵa 17 mlrd teńgege jýyq qarajat bólindi. Aýyldarda mektepter, balabaqshalar, dárigerlik ambýlatorııalar, kentishilik joldar men sýmen jabdyqtaý jelileri kúrdeli jóndeýden ótedi», - dedi ákim.