Soltústikqazaqstandyqtarǵa minsiz qyzmeti úshin medali tapsyryldy

PETROPAVL. QazAqparat - Petropavlda Otan qorǵaýshylar kúnine arnalǵan merekelik is-sharalar ótip jatyr, dep habarlaıdy QazAqparat tilshisi.

Soltústik Qazaqstan oblysynda búgin kún bulttanyp, jańbyr jaýyp tur. Soǵan qaramastan Petropavldaǵy ortalyq alańda júzdegen qala turǵyndary jınaldy. Búgin munda Otan qorǵaýshy kúnine arnalǵan negizgi is-sharalar ótip jatyr.

Shara Qarasaı men Aǵybaı batyrdyń eskertkishterine jáne Petropavl garnızonynyń  qurylymyna gúl shoqtaryn qoıýdan bastaldy. Oblys ákimi Qumar Aqsaqalovtyń atynan soltústikqazaqstandyqtardy onyń orynbasary Anton Fedıaev quttyqtady. Ol 7 mamyrdyń Qazaqstan Respýblıkasy Qarýly Kúshteriniń kúshi men aıbynynyń kórinisi ekendigin jáne Otan qorǵaýshylardyń birneshe urpaqtarynyń áskerı dástúrleriniń sabaqtastyǵyn beıneleıtinin atap ótti.

«Egemendi Qazaqstan Respýblıkasyn qorǵaý - qurmetti jáne jaýapty mindet. Áskerı qyzmetshilerdiń erligi, aıbyny men kásibıliginiń arqasynda Otanymyz ben azamattarymyz ashyq aspan astynda beıbit ómir súrip jatyr», - dedi A.Fedıaev.

Oblys ákiminiń qoly qoıylǵan qurmet gramotasyna bes soltústikqazaqstandyq ıe boldy. Sondaı-aq, úsh adam alǵys hatpen marapattalsa, A.Fedıaev 1 jáne 2 dárejeli «Minsiz qyzmeti úshin» medalin eki áskerı qyzmetshige tabys etti.

Petropavlda búgin kúni boıy merekelik kontsertter, jastar baǵdarlamalary ótedi. Oblystyq patrıottyq ánder baıqaýy men qazaq kúresinen birinshilik josparlanǵan.