Soltústikqazaqstandyq ájeler naýryz kóje ázirleýdiń syrymen bólisti

PETROPAVL. QazAqparat - Naýryz kóje - merekeniń basty taǵamy, dastarqannyń sáni. Jyl boıy molshylyq bolsyn, shańyraqtan yrys-qut ketpesin degen yrymmen ár otbasy ulttyq asty ázirleýge tyrysady. Qyzyljar óńiriniń ájeleri meıram qarsańynda naýryz kóje daıyndaýdyń syrymen bólisti, dep habarlaıdy QazAqparat tilshisi.

Petropavl qalasynyń turǵyny Altyn Jarasova naýryz kójeni jıyrma jylǵa jýyq ázirlep keledi. Aıtýynsha, ulttyq taǵam 7 túrli dámnen daıyndalǵanymen, ár óńirdiń, tipti, ár otbasynyń pisirgen kójesiniń óz ereksheligi bar. Zeınetker bıyl da qazanǵa mol etip naýryz kóje ázirlep, otbasy múshelerine ǵana emes, kórshilerge de aýyz tıgizbek.

«Naýryz kójege eń aldymen sýdy alamyz. Sý - tirshilik kózi. Árıne et qosamyz, súr et bolsa tipten jaqsy. Qazaqty etsiz elestetý qıyn, as mol bolsyn degen yrymmen salynady. Tuz qosamyn. Júgeri, bıdaı salý kerek. Ósip-ónsin, kóbeısin degen maǵynada. Sońynda «aq mol bolsyn» degen tilekpen qatyq quıamyn. Ezilgen qurt taǵamnyń dámin keltiredi. Daıyn kójeni jeti úıge taratyp, jeti shańyraqtan dám tatý qajet», - deıdi Altyn áje.

Qyzyljarlyq taǵy bir áje - Raýza Amanjolova «ár otbasy naýryz kóje pisirýge mindetti» dep esepteıdi. Aq jaýlyqty ananyń aıtýynsha, úıde qandaı dám bar sonyń bárin ulttyq taǵamǵa qosýǵa bolady. «Naýryz kójeniń quramy 7 dámnen asýy múmkin, tek taq san bolýy kerek» degen pikirde.

«Keı óńirlerde naýryz kójege kókónis qosady, meıiz salady eken. Quramy ártúrli bolýy múmkin. Kimge qalaı unaıdy, úıinde ne bar - sony qosady. Kıeli 7 sannan kem bolmaýy qajet. Men ózim etti, arnaıy saqtaǵan súrdi, bıdaı jarmasyn, tary men kúrishti aldyn ala bólek pisirip alamyn. Sorpaǵa qurt ezemin. Etti usaqtap týrap, qosamyn. Jylqynyń eti bolý mindetti emes. Osydan keıin pisip turǵan dándi daqyldardy aralastyramyn. Sońynda aıran nemese sút quıamyn», - deıdi Raýza Amanjolova.

Qyzyljarlyq ájelerdiń aıtýynsha, naýryz kójege qandaı dámniń qosylatyny mańyzdy emes - Ulystyń Uly kúni jasalatyn qasıetti taǵamdy eń bastysy - jaqsy tilek tileı otyra, yqylaspen ázirlep, usyný qajet. Óıtkeni, naýryz kóje - toqshylyq pen mol yrystyń, qut-berekeniń joralǵysy.