Soltústik jartyshardaǵy bir juldyz «Astana Juldyzy» dep ataldy

ASTANA. QazAqparat - Soltústik jartysharda Arystan juldyzdar tobyndaǵy bir juldyzǵa qazaqstandyq estrada ártisteriniń qurmetine «Astana Juldyzy» ataýy berildi. Bul týraly búgin Ekinshi «Astana Juldyzy. Ulttyq mýzyka báıgesi»-2014» baıqaýynyń bastalýyna arnalǵan baspasóz máslıhatynda Astana qalasy ákimdigi Mádenıet basqarmasynyń basshysy Bolat Majaǵulov aıtty.

«Bul biz úshin óte mańyzdy oqıǵa. Aspanda «Astana Juldyzy» atty juldyz paıda boldy. Qazaqstan estrada juldyzdarynyń óz juldyzy bar ekenin dáleldeıtin sertıfıkat ta qolymyzda», - dedi ol.

"Ǵarysh-Jer" halyqaralyq juldyzdar kitapshasynda tirkelgen 14-shi kólemdegi juldyzdyń (teleskoppen kórýge bolady) ornalasqan jeri: batysy 09 24 44.34 jáne shyǵysy 20 06 15.2. Aıta keteıik, Astana qalasy ákimdigi «Astana Juldyzy. Ulttyq mýzyka báıgesin» alǵash ret byltyr Astana kúniniń 15 jyldyǵyna oraı uıymdastyrdy. Alǵashqy qadamnan-aq "Astana juldyzy. Ulttyq mýzyka báıgesi" Qazaqstan mýzyka óndirisindegi eń bedeldi, shoý-bıznestegi eń jarqyn jobaǵa aınaldy. Byltyr báıgeniń laýreaty atanǵan tanymal ártister: Roza Rymbaeva, "MýzART", "Ulytaý", "Musicola", "Kesh You", Marjan Arapbaeva jáne basqalar boldy. "Astana juldyzy. Ulttyq mýzyka báıgesi" álemdegi eń tanymal mýzykalyq báıgeler erejesine saı júrgiziledi. Jobanyń basty ereksheligi - júldegerlerdi tańdaýdaǵy kásibılik. Otandyq mýzykanyń damýyna úles qosqan ónerpazdardy quramynda 100 kásibı maman - eńbegi sińgen ártis, prodıýserler, kompozıtorlar, aqyndar, mýzyka jáne fashion-óndiris mamandary, BAQ ókilderi bar Qazaqstannyń mýzykalyq akademııasy tańdaıdy. Daýys berýdiń osy júıesi álemdik deńgeıde qoldanylyp júr.