Soltústik jáne shyǵys óńirlerge gaz tartý jobasy pysyqtalyp jatyr - QazaqGaz

ASTANA. QazAqparat – Jaqyn arada qolda bar taýarlyq gaz resýrstary arqyly soltústik jáne shyǵys óńirlerdi gazdandyrý múmkin emes. Bul týraly «QazaqGaz» UK» AQ basqarma tóraǵasynyń marketıng jónindegi orynbasary Arman Qasenov aıtty, dep habarlaıdy QazAqparat tilshisi.

«Sondyqtan, soltústiktegi kórshimizben yntymaqtastyq qarastyrylyp, tıisti usynys aıtyldy. Joba aıasynda tıisti jeli Qazaqstannyń shyǵys jáne soltústik óńirlerin gazdandyrý múmkindigimen tranzıttik gaz qubyry túrinde tartylýy kerek», - dedi A. Qasenov elordada ótken qoǵamdyq keńes jıynynan keıin tilshiler suraǵyna jaýap bere otyryp.

Osy oraıda, oǵan Qazaqstannyń basqa óńirlerimen salystyrǵanda ShQO aýmaǵyndaǵy gaz baǵasynyń aıyrmashylyǵyna qatysty suraq qoıyldy.

«Aıyrmashylyq bolatyny anyq. Sondyqtan, elimizdiń shyǵys óńiri jaıynda aıtsaq, bul – Shyǵys Qazaqstan oblysy arqyly Qytaıǵa Reseıdiń gazyn jetkizýdiń eń jaqyn joly. Bul turǵyda tranzıt, gazdandyrý sııaqty eki jaqqa da tıimdi máselelerdi eskerý qajet», - dedi A. Qasenov.

Bul rette ol qazirgi kezde kompanııa osy másele boıynsha «Gazprommen» kelissóz júrgizip jatqanyn jetkizdi.

Budan buryn habarlanǵandaı, Energetıka mınıstri Bolat Aqsholaqov elimizdiń shyǵys óńiri Reseıden qubyr tartý arqyly gazdandyrylýy múmkin ekenin aıtty.

Osy oraıda, QazaqGaz «Gazprommen» birlesip, «Reseı Federatsııasy - Qazaqstan Respýblıkasy - Qytaı Halyq Respýblıkasy» halyqaralyq gaz qubyryn salý máselelerin zerdeleý úshin aldyn ala tehnıkalyq-ekonomıkalyq negizdeme ázirleý máselesin pysyqtap jatyr.

Sonymen qatar, Premer-Mınıstr Álıhan Smaıylov elimizdiń soltústigi men shyǵysyn gazdandyrý boıynsha túpkilikti sheshim 1 mamyrǵa deıin qabyldanýy tıistigin aıtqan edi.