«Soltústik–Ońtústik» dálizi marshrýtynda Biryńǵaı logıstıkalyq operator qurylady - QTJ

ASTANA. QazAqparat - «TransRussia 2023» kólik-logıstıkalyq qyzmetterdiń 27-shi halyqaralyq kórmesi aıasynda «KTZ Express» AQ, «RJD Logıstıka» AQ jáne «Túrikmenstannyń kólik-logıstıkalyq ortalyǵy» AAQ arasynda tasymaldaýdy damytý úshin birlesken kásiporyn qurý týraly memorandýmǵa qol qoıyldy, dep habarlaıdy «Qazaqstan temir joly» UK» AQ baspasóz qyzmeti.

Birlesken kásiporyn maqsaty «Soltústik-Ońtústik» halyqaralyq kólik dáliziniń shyǵys baǵytynda Biryńǵaı logıstıkalyq operator qurý bolady.

Memorandýmǵa «KTZ Express» AQ Bas dırektory Qaırat Ýtıapov, «RJD Logıstıka» AQ Bas dırektory Dmıtrıı Mýrev jáne «Túrikmenstannyń kólik-logıstıkalyq ortalyǵy» AAQ bas dırektory Merdan Bıashımov qol qoıdy.

Taraptar básekege qabiletti tarıftik stavkalardy qalyptastyrý jáne Aqsaraı, Ozınkı, Bolashaq, Inche-Býrýn, Serahs shekaralyq ótkelderiniń qatysýymen Qazaqstannan, Reseıden, Túrikmenstannan Iranǵa, Úndistanǵa, Taıaý Shyǵys elderine jáne Azııa-Tynyq muhıty óńirine júkterdi «úzilissiz» tasymaldaý úshin óz quzyretterin biriktirýge kelisti.

Qazaqstan úshin «Soltústik-Ońtústik» dálizi Iran men Úndistanmen kólik-ekonomıkalyq baılanystardy damytýdaǵy basty ósim núkteleriniń biri bolyp tabylady. Qazaqstandyq júk jóneltýshiler atap ótkendeı, osy qurlyq dáliziniń Qazaqstan aýmaǵy arqyly aıqyn artyqshylyǵy júkterdi jetkizýdiń joǵary jyldamdyǵy jáne tasymaldaýda barlyq aýa raıynyń qolaılylyǵy bolyp tabylady.