Soltústik óńirlerge kóshetinderdiń 50% baspana shyǵynyn Úkimet tóleıdi

ASTANA. QazAqparat – Eńbek jáne halyqty áleýmettik qorǵaý mınıstrligi eńbek kúshi az óńirlerge qazaqstandyqtardy qonystandyrý protsesin jetildirip jatyr, dep habarlaıdy QazAqparat tilshisi.

«Búginde eńbek kúshi tapshy óńirlerdiń máselesi kún tártibinde. Ol degenimiz jumys kúshi az, ásirese soltústik óńirlerge ońtústikten azamattardy kóshirý. Jyl saıyn kvota bólinip keledi, onyń kólemi artýda. Mysaly, bıyl ótken jylǵa qaraǵanda 566 kvotaǵa kóbeıdi. Azamattardy qonys aýdarýǵa yntalandyrý maqsatynda atalǵan sharýany avtomattandyrý qolǵa alyndy»,- dedi Іlııas Ispanov ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, ár óńir boıynsha jol kartasy bekitilip, kóshýge tapsyrys aldyn ala beriledi.

«Sonymen qatar búginde utqyrlyq sertıfıkaty engizildi. Ol boıynsha azamattardy baspanamen qamtý shyǵynynyń 50 paıyzyn Úkimet tólep beredi, qalǵan 50 paıyz shyǵyndy jergilikti atqarýshy organ nemese jumys berýshi óteıtin bolsa, onda kvota sany arta túspek», - deıdi kóshi-qon komıtetiniń basshysy.

Sondaı-aq, brıfıng barysynda kóshi-qon máselesine qatysty birneshe jaıttar belgili boldy.

Atap aıtqanda, elimizge ınvestıtsııa quıǵan shetel azamattaryna ımmıgrant vızasymen qatar 10 jyl turýǵa ruqsat berilmek.

Búginde Qazaqstanda 14 417 shetel azamaty jumys istep jatyr.

Qazaqstandyqtardyń Ońtústik Koreıada eńbek etý máselesin ekijaqty kelisim arqyly zańdastyrý jaǵy qaralyp jatyr.

Aldaǵy ýaqytta qandas mártebesine qujattar Qazaqstannyń sheteldegi elshilikterinde qabyldanady.