Soltústik Qazaqstandaǵy Qarabek kólinde balyq qyryldy

PETROPAVL. QazAqparat – Soltústik Qazaqstan oblysy Beskól aýylyndaǵy Qarabek kólinde 400 kg balyq qyrylyp qaldy, dep habarlaıdy QazAqparat tilshisi.

4 shilde kúni áleýmettik jelide Qyzyljar aýdany Beskól aýylyndaǵy Qarabek kólinde balyqtyń qyrylǵandyǵy jóninde vıdeo tarady.

Turǵyndardyń aıtýynsha, móńke balyǵy eki kúnniń ishinde qyrylyp, jaǵaǵa shyǵyp qalǵan. Kúnniń ystyǵynan jaman ıis aýaǵa tarap, jaqyn mańdaǵy turǵyndardyń mazasyn alypty. Balyqtyń qyrylýyna kóldiń jaǵasyna salynǵan eki monsha sebep bolýy múmkin.

SQO balyq sharýashylyǵy ınspektsııasy osy oqıǵaǵa qatysty túsinik berdi.

Mamandardyń aıtýynsha, 3 shilde kúni Qarabek kóline Esil oblysaralyq basseındik balyq sharýashylyǵy ınspektsııasy, tabıǵı resýrstar jáne tabıǵı paıdalanýdy retteý basqarmasy, ekologııa departamenti, Qyzyljar aýdandyq veterınarııa bólimi jáne Beskól aýyldyq okrýgi ákimdigi mamandary baryp, jaǵdaıdy kórdi.

Jumys toby sý qoımasynyń jaǵalaýyn aralap-zerttep, móńke balyǵynyń qyrylǵanyna kóz jetkizdi.

«Veterınarlyq qyzmet pen ekologtar sý men ólgen balyqtyń synamasyn alyp, zerthanalyq saraptamaǵa jiberdi. Beskól aýyldyq ákimdigi mamandary kóldi tazartyp, ólgen balyqty joıdy. 400 kg balyq qyrylǵan. Balyqtyń neden ólgeni zerthanalyq tekserýden keıin ǵana belgili bolmaq», - deıdi Esil oblysaralyq basseındik balyq sharýashylyǵy ınspektsııasynyń bólim basshysy Ildar Kákimov.

Qarabek kóli Beskól aýylynda ornalasqan. Aýmaǵy - 10 ga jýyq, tereńdigi – 1,2 m shamasynda. Sý qoımasy oblystyń balyq sharýashylyǵy kólderi tizimine engizilmegen.