Soltústik Qazaqstanda jumys kúshi jetispeıdi

PETROPAVL. QazAqparat – Soltústik Qazaqstan oblysynyń ákimi Qumar Aqsaqalov óńirde jol qurylysy salasynda mamandar jetispeıtinin málim etti, dep habarlaıdy QazAqparat tilshisi.

Ákimdik otyrysynda aımaq basshysy áleýmettik salaǵa jetekshilik etetin óziniń orynbasary Ganı Nyǵmetovke jol qurylysy mamandaryn daıarlaýdy tapsyrdy.

«Jyl saıyn jol qurylysyndaǵy jumystar kóbeıgendikten, bizde jumys kúshi tapshy. Basqa óńirlerden jumysshylardy tartýǵa týra keldi. Bul durys emes. Óz óńirimizden jumys kúshin tartýymyz kerek. Jumys kólemi az bolmaıdy», - dedi Q.Aqsaqalov.

Oblys ákiminiń aıtýynsha, qurylys salasyndaǵy jumys kóleminiń ósimi merdiger uıymdardy jumyspen qamtýǵa múmkindik berdi.

«Eki jyl buryn jol jóndeý jumystaryna 21 kompanııa tartylǵan bolatyn, olardyń tek jartysy ǵana bizde ornalasqan, dálirek aıtsaq, Soltústik Qazaqstanda tirkelgen. Bıyl árbir tórt merdigerdiń úsheýi – bizdiń jergilikti kompanııalar. Nátıjesinde jergilikti merdigerlerdi jumyspen qamtamasyz etý arqyly salyq bazasy artyp, bıznes damıdy. Memlekettik qoldaýdyń jáne jańa jumys oryndarynyń arqasynda biz bıýdjettiń kiris bóligin 170% asyra oryndaımyz. Bul eń aldymen salyqtar esebinen», - dep atap ótti Q.Aqsaqalov.